انا كمان

Monir El-Shazly
Oct 28, 2018
2 min read

حمله طلعتها “اليسا ميلانو ” علشان تشجيع الستات اللي تم التحرش بيها انها ماتخافش تقول ان ده حصل…. و ماتكتمش الموضوع جواها…. و تحس ان عندها “علامة عار ” لازم تخبيها.

المشكله ان بنات كتير من اللي اتعرضوا لده…. بيتبني عندهم شعور بالعار من نفسها و جسمها…. و غضب و كراهيه شديده للرجاله …علي اعتبار ان كلهم كده، بس من اللي بشوفوا في شغلي.. كمية “الرجاله” اللي حصلها تحرش جسدي في مصر ، كميه كببره جدا…..

و الخوف عند الرجاله انهم يقولوا كده بيبقي ساعات اكبر من الخوف عند الستات ( علشان مايتقالش عليهم مش رجاله و ماقدروش يدافعوا عن نفسيهم).

الحل في التعامل مع المشكله دي مش حل صغير او سهل …. لان المشكله ليها جذور في التربيه و مفهوم الدين و مفهوم الراجل و الست…. و الحلال و الحرام… و الثقافه الجنسيه (اللي هي اصلا مش موجوده في المجتمع بتاعنا بشكل عام).

انما اعتقد ان البدايه اللي في ايد كل واحد فينا انه يبتديها انه مايخافش يقول و يبطل يدفن راسه في الرمل (و يقول ان دي حوادث فرديه) ، و الاهم من كده ان كل ام و اب يخلقوا بيئه صالحه لولادهم انهم ييجوا يحكولهم عن اي حاجه ممكن تحصلهم (حتي لو كانت صغيره) ، من غير ما الطفل يخاف من رد فعل الاهل و العار و العقاب من الاهل علي ان دي غلطته…. و الاهم من كل ده ان الاهل يحتضنوا الطفل و مايدولوش شعور بالعار و (يا نهار اسود…. دي حاجه لازم تستخبي و مانقولش لحد عليها) اللي بشوفها كتير للاسف

دراسات كتيره اتعملت علي الكلام ده و وضحت ان معظم الاهالي اللي اتعاملوا مع اولادهم غلط لما حصلهم كده ، كان هم نفسهم اتعرضوا لكده و هم صغيرين و اهلهم ما عرفوش يتعاملوا معاهم.

قربوا من ولادكم…. و ماتخلوش الخوف من العار و الفضيحه يفرق بينكم و بينهم…. احصنوهم لو حصلهم كده…. و عرفوهم ان دي مش غلطتهم…. و انهم مش محتاجيين يخافوا من الناس كلها علشان في شخص اذاهم…. و فوق كده ماتحسسوهومش ان دي فضيحه لازم نداريها و “علامه” لازم نغطيها!

Facebook page : http://www.facebook.com/Inspiredbeingcoaching

YouTube : http://www.YouTube.com/c/MonirElShazly