انا ابني راجل !

انا ابني راجل!

----

امهات كتيره كانت كاتبه عن مسلسل #تحت_الوصايه و مبسوطين قوي من شخصية الطفل "ياسين" و قد ايه هو شايل مسئولية أخته و بيتصرف كشخص مسئول و ناضج، و نفسهم يطلّعوا ولادهم ناضجين و متحملين للمسئوليه زيه ... للناس دي، و للناس ألي شايفه أن "الطفل الكبير" المفروض يشيل مسئولية الطفل الصغير ، احب اقولهم أن ده "بيدمّر " الطفل الكبير في علاقاته بعد كده ...و طبعا بيأثر تأثير سلبي علي علاقه بأهله !

الطفل مش مسئوليته أنه يشيل مسئولية اخواته بالنيابه عن أهله ...و لا دوره أنه يتصرف اكبر من سنه علشان يرضيهم ...

ولا دور الولد أنه يبقي "الراجل" بتاع أمه لو كانت هي ارمله او مطلقه ...

اطفال كتير بتعمل كده بدافع الحب (و ساعات بالفرض من الأهل) ، إنما ده بيخليهم ياخدوا ادوار اكبر من أدوارهم في الحياه ... و بعد كده بيبقوا عُرضه في علاقاتهم أنهم يجتذبوا أشخاص "علشان ياخدوا بالهم منهم" زي ما عملوا مع إخواتهم ...

أو أشخاص تانيين يلعبوا معاهم دور الأم بدل الأم اللي كَبَرتهم بسرعه علشان ياخدوا بالهم من اخواتهم الصغيرين!.

اه ساعات بتحصل مواقف تخلي الاولاد الكبار ياخدوا بالهم من إخواتهم الأصغر (أو اخواتهم ذوي الاحتياجات الخاصه)...بس ده مش هو الأساس....و مش المفروض أنه يستمر علي طول.

دور الطفل أنه يكون طفل، و حتي مسئوليته هوّ ، مش محتاج يشيلها "كلها" لغاية ما يبقي قادر يعتمد علي نفسه ... و يبتدي يتعود يشيلها بالتدريج مع تطور عمره ... انما يشيل مسئولية طفل تاني دي كارثه ..بشوفها و بسمع عنها كل يوم في شغلي (خصوصا في الثقافات اللي فيها دي هي القاعده ..أن الأم تخلف، و الاب يروح يجيب فلوس....و الاخوات الكبار، خصوصا لو بنات ياخدوا بالهم من الاخوات الصغيرين )...

لو الام أو الأب ماعندهومش وقت ياخدوا بالهم من الاولاد الكتير، يبقي احسن ليهم و لأولادهم أنهم يخلفوا واحد أو اتنين ...

انما الطفل ...من حقه أنه يفضل طفل....لغاية ما يكبر ...

#منير_الشاذلي

(إعادة نشر)

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual