الشتيمه في السر !

ناس كتيره مبسوطه من "الفتوي" دي ...

طبعا انا متخيل أن الكلام ده جزء مقطوع من فتوي..او تحريف لفتوي ...لأن لو دي فعلا فتوي لدار الإفتاء تبقي كارثه...

فيه ايه صريحه في سورة البقره بتقول "وَإِن تُبْدُوا مَا فِي أَنفُسِكُمْ أَوْ تُخْفُوهُ يُحَاسِبْكُم بِهِ اللَّهُ ۖ فَيَغْفِرُ لِمَن يَشَاءُ وَيُعَذِّبُ مَن يَشَاءُ ۗ وَاللَّهُ عَلَىٰ كُلِّ شَيْءٍ قَدِيرٌ"

ده غير حديث شريف بيقول "ان الله لا ينظر إلي اجسامكم، ولا الي صوركم... و لكن ينظر إلي قلوبكم!"

القصه مش في قصة اللي ببينه، القصه في قصة اللي جوايا ...

و فكرة اني اشتم في سِري ممكن تبان احسن من اني اشتم الناس في العَلَن و اعمل خناقه... انما ده غالبا معناه غضب مكبوت (suppressed anger ) و النوع ده من الغضب ليه اضرار كتيره جدا علينا!

علي المستوي النفسي ، الشخص الغضبان علي طول محتاج يشوف اسباب غضبه و يشتغل عليها ..مش علشان يشتم في السر، إنما علشان الغضب معناه أن فيه "حاجه جوانا" محتاجين نشوفها ...و نصلحها ...

طبعا ده غير أن لو الإنسان عايز يرتقي و يتطور روحانيا، من اول الحاجات اللي محتاج يشتغل عليها أنه يبطل يشوف الناس أقل منه، او يشوف نفسه "احسن" من الناس التانيين ... مش يشتمهم كمان...

مفهوم "طالما ما حدش شايفك إعمل كل حاجه في السر" ده كارثه و بقي منتشر جدا في حياتنا... و النتيجه احنا شايفينها في المجتمع دلوقتي ... حتي لو دار الإفتاء قالت غير كده !

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual