الدور الأهم !

بعد البوست اللي كتبته امبارح عن "أضرار فكرة اني اصاحب اولادي" اللي ساعات بتخلي الاب أو الأم يتخلوا عن دورهم الأساسي ك أم او أب، كان فيه اعتراض من بعض الناس علي البوست، و عليا انا شخصيا، من ناس المفروض انهم شغالين في مجال العلاج النفسي و الكوتشينج.

فيه بس حاجات مهمه البوست بتاع امبارح بيّنها و احب اتكلم عنهم

١- لما بقول أن الاهل مش المفروض يصاحبوا اولادهم ( علي حساب انهم يكونوا أم او اب ليهم )، ده مش معناه اني بشجع اسلوب التربيه اللي مبني علي القهر و فرض السلطه و الاعتداء علي الحريات. الناس اللي افتكرت كده، زي ما تكون بتفترض اني لو قولت أن "لو حاجه لونها مش ابيض، تبقي اكيد لونها اسود!".

الفكرة اني ما ابقاش صاحب اولادي، مش معناها اني اقهرهم أو اكون اب متسلط، الفكره أن الام أو الأب دورهم الأساسي مع الأبناء هو الاحتواء، والدعم و الحمايه ( اللي بيقل مع الوقت لما بيكبروا)، و الدور ده مش حيتلعب بالشكل الكافي لو بقيت صاحبهم .

مفهوم التسلط و القهر و الإجبار بردو مافيش فيه احتواء... الفكره هنا في اني "اخد مكاني كأم أو أب" و ان اولادي يعرفوا أن ليهم ظهر و حد ممكن يروحوله لو فيه مشكله (و ده في حد ذاته بيديهم شعور بأني واثق في قدرتهم علي اتعامل مع المواقف)... مش اني اتسلط علي اولادي و اقهرهم!.

٢- معظم الناس اللي عارضت كلامي امبارح، كان وجهة نظرهم أن "لما اصاحب اولادي حبقي عارفه أسرارهم و مش حيخبوا عني حاجه" ، و دي فكره اساسا مبنيه علي الخوف و مفيش فيها empowerment و ثقه في الاولاد .

كل الاولاد حيبقي ليهم اسرار في حياتهم، بس الفكره هي انهم يبقوا عارفين أن "بابي مفتوح " ليهم لما يحتاجوني و أني واثق في حكمهم علي المواقف و تعاملهم معاها...إنما لو فيه مشكله ..انا موجود!

٣- جزء من الناس اللي عارضتني امبارح (و كانت المعارضه بشكل عنيف) كانوا من الناس اللي شغالين في مجال علم النفس او مجال الكوتشينج، و ده بيأكد اللي بشوفه في شغلي من أن ناس كتيره اخدت كورسات و ابتدت تشتغل في المجال ده بدون ما يبقي عندهم القدره علي الاستماع أو الفهم الجيد للكلام.

عادي أن يكون فيه اختلاف لوجهات النظر، و انا عمري ما قولت أن كلامي "منَزّه عن الخطأ"، إنما معظم الناس اللي عارضتني امبارح و شغالين في المجال ده، كان باين من كلامهم أنهم بنوا افتراضات علي حاجات انا ما قولتهاش، و افترضوا اني بشجع نمط الآباء و الأمهات السلطوي اللي فيه قهر للأبناء... (و دي حاجه انا ماقولتهاش خالص) ... بس طبعا السبب الأساسي في الاعتراض العنيف بيبقي دائما لأن الكلام ده سمّع في حاجه عندهم هم و في علاقتهم بأهاليهم ...و فيه ناس منهم اعترضوا من منطلق "انا فاهم و دارس نظريات التربيه الحديثه" و بقول أن الكلام ده غلط" ... و للاسف افتراض الكلام اللي ماتقالش (و بناء موقف عليه) ، و افتراض أن "انا فاهم" هما صفتين مهم أن أي معالج نفسي او كوتش مايبقوش عنده 😊.

الخلاصه ...أن دور الأب و الأم الاول و الاساسي انهم يكونوا اب و ام و يوفروا "الاحتواء" و الدعم للاولاد خلال مراحل النمو (اللي بيتغيّر قدره و طريقته مع اختلاف المرحله) ... و الدور ده بيتلعب احسن من مكانهم، مش من مكان الصديق!.

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: @monir.elshazly.spiritual