الام و الاب.. تاني!

انا انفصلت عن ابويا و امي في السكن من و انا عندي ٢٥ سنه، و من ساعتها (بخلاف ٣ سنين كنت فيهم متجوز) و انا عايش لوحدي. انما فضلت دايما الرابطه اللي بيني و بين اهلي قويه جدا… و كانت اقوي فتراتها في السنه في رمضان…لما كنا بنتحمع علي الفطار مع بعض و نتفرج علي حاجه في التليفزيون.. قبل ما اقوم اقول اني عايز امشي علشان عندي ميعاد مع اصحابي. و دايما كان بابايا بيقولي “خلاص… انت بقي تفطر معانا في رمضان كل يوم “… و انا ارد عليه و اقوله “مش حينفع.. علشان عندي اصحاب و عزومات طول الاسبوع الجاي “…

اما امي فكانت دايما تقولي “مالحقناش نقعد معاك “… و ساعات كانت بتقولي ” الحق اقعد معانا ..علشان لما نمشي حنوحشك”. كنت باسمع كلامها و بحاول اشوفهم وقت اكتر… انما ماحسيتش بمعني كلامها الا لما فعلا هم الاتنين مشيوا!.

الام و الاب دول حاجه كبيره جدا… و وجودهم في الحياه ( حتي لو ماكناش علي علاقه قويه بيهم)؛بيدٖي شعور كبير بالامان و الارتباط بالحياه ، مش بيحسه الا الشخص اللي فقدهم. الشعور ده هو اللي بيخلي تجارب كتيره في الحياه يبقي ليها طعم . يمكن علشان كده جزء اساسي من شغل الكوتشينج بتاعي بيركز علي العلاقه مع الاب و الام كأساس ؛ مش بس لكل علاقاتنا ، انما كعامل مهم في استمتاعنا بالحياه!.

استمتعوا بوحود ابوكم و امكم في حياتكم، قربوا منهم و افتحوا قلبكم ليهم…. افتكرولهم حاجات كوبسه عملوهالكم و ذكريات جميله ليكم مع بعض. و استمتعوا باولادكم قبل ما يكبروا… و لما يكبروا استمتعوا بيهم لما كبروا… و لو عندكوا مشاكل كبيره مع اولادكم ، شوفوا علاقتكوا باهلكم عامله ازاي…لأن العلاقه مع الاولاد في معظم الاحيان بتبقي مرايه للعلاقه مع الام او الاب.

و اعرفوا ان عنري ماجالي حد عنده اكتئاب، و هو علاقته بابوه و امه كويسه و قلبه مفتوح ليهم هم الاتنين.

كل سنه و انتم طيبين.

#منير_الشاذلي

#Monir_El_Shazly

Youtube: http://www.YouTube.com/c/MonirElShazly

Facebook page : http://www.facebook.com/Inspiredbeingcoaching