الاحترام للمرأه!
- Monir El-Shazly
- Feb 19, 2024
- 2 min read
من حوالي سنتين بالظبط ، السوشيال ميديا كانت منشغله تماما بموضوع #عروسة_الاسماعيليه و اعتداء عريسها عليها بالضرب في الشارع، و كتبت ساعتها اني مبسوط من أن القصه دي حتعمل ضغط شعبي علي فتح موضوع ضرب الزوجات ( تحت مسمّي الدين) و ده فعلا حصل و ابتدت شيوخ تتكلم فيه بشكل أكثر وعيا (في رأيي) من قبل كده .
طبعا الست دي رجعت لجوزها تاني يوم و قالت إن "هي اللي غلطانه " و معظمكم عارف بقيت القصه (لأنها قصه مكرره شوفناها حصلت لناس كتيره في حياتنا)
و علي الرغم من أني طبعا كنت احب أن النهايه ماتبقاش كده و أنها ماتقولش إن "هي السبب... و هي اللي عصَّبته علشان كده ضربها" ... زي ما للأسف أهالي كتيره بتحاول تبرر قلة احترام الزوج لزوجته بالطريقه دي، الا إني مش عارف ايه "ظروفها" اللي خليتها تقول الكلام ده، و كمّ الضغط اللي ممكن تكون اتعرضت ليه علشان تشيل هي الليله كلها!
في رأيي الشخصي، مفيش اي سبب يبرر أن راجل يمد أيده علي ست، او يستخدم قوته الجسديه علشان يجبرها علي حاجه، بأي شكل من الأشكال ... و ان الوقت جه أننا نفتح الموضوع ده و نعمل قانون يجرّمه ( حتي لو كان فيه لسه "رجال" دين بيبرروا ليه تحت مسمّي أن الستات "ناقصات عقل" و الكلام ده).
و علي الرغم من أن في رأيي أن الستات هي اللي محتاجه تاخد موقف و ما تتهاونش في حقها لو حد اعتدي عليها (تحت اي مسمي او بأي طريقه)، الا أني متعاطف مع الستات اللي ساعات مابتقدرش تاخد موقف زي كده، علشان للاسف غالبا مابيبقاش ليها "ظهر" من العيله بتاعتها تتسند عليه !
و ياريت كل ام او اب يعلموا أولادهم من دلوقتي أن أستخدام الصوت العالي أو استخدام القوه الجسديه علشان أجبر الست أنها تسمع كلامي ده مش رجوله...ده قلة رجوله ....
انما "#الرجوله" ليها معاني كتير تانيه، منها اني احمي الست لو هي في أحيان بيبقي ماعندهاش القوه الجسديه أنها تحمي نفسها!
و كمان اتمني أن كل ام و اب (و اخوات) يحسسوا البنت أن ليها ظهر، و يكرّموها...بدل ما يحسسوها أنهم (عايزين يجوزوها و يخلصوا منها)
المجتمعات اللي الستات فيها مُهَمَشه او بيتبصلها كمخلوق "درجة تانيه" بعد الراجل (زي ما بيحصل للاسف كتير في مجتمعنا)، حتلاقيها دائما مجتمعات فيها نسب كبيره من التطرف و الجهل ... لأن ببساطه، البنت اللي بتتهان دلوقتي، هي الام اللي اولادها حيشوفوها بتتهان بعدين !
بس انا شايف أن الوضع ده ابتدي يتغير و أن ستات كتيره ابتدت تاخد موقف ..حتي لو كان أهلها مش مدينها الدعم الكافي ...
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments