اصل انا عصبي و لازم تستحملوني!
- Monir El-Shazly
- Aug 1, 2023
- 2 min read
اصل انا عصبي و لازم تستحملوني!
-----
كتير قوي بسمع من الناس الجمله دي، "اصل انا عصبي، و لما بتنرفز مابشوفش اللي قدامي! " و ناس كتير بتاخدها حجه علشان تتصرف تصرفات او تقول كلام جارح للناس التانيه من غير ماتتحاسب عليه.... و السبب "انهم عصبيين".
الغريبه ان الناس "العصبيين " دول في كتير من الاحيان بيكونوا رجّاله ... كأن الرجاله عندهم "إعاقه معينه" مابتخليهومش يعرفوا يتصرفوا في انفعالاتهم ( طبعا ده مش حقيقه..الحقيقه ان كتير منهم علشان المجتمع اللي احنا فيه طلعوا متدلعين في البيت و لما اتنرفزوا ماحدش وقّفهم عند حدهم) ... و كتير من الرجاله اللي اتعلموا يحترموا الآخرين من و هما صغيرين طلعوا "سبحان الله" مابيتعصبوش علي الناس التانيه!
الغريبه كمان ان الناس "العصبيه " دي بيعرفوا يمسكوا نفسهم و يتحكموا في عصبيتهم لما بيتعاملوا مع المديرين بتوعهم او مع حد همَ عايزين منه حاجه.. انما عدم التحكّم في العصبيه ده بيطلع بس مع الناس اللي هم حاسيين انهم اضعف منهم ، او حيستحملوهم لسبب او لآخر.
الاغرب كمان ان فيه بوستات غريبه بتبرر عصبية الناس بلاقي مكتوب فيها أن الإنسان العصبي ده من جواه انسان طيب و خدوم، كأن ده سبب كافي اني استحمل الشخص العصبي ده علشان هو "طيب"!
و مع اعترافي أن طبعا الكيمياء بتاعت المخ ليها تأثير كبير، و أن ساعات امراض زي ارتفاع ضغط الدم أو السكر بيكون ليها تأثير علي العصبيه، و ساعات كمان حاجات نفسيه زي اضطراب فرط الحركه (ADHD) او اضطراب الثنائية القطبيه (bipolar) ممكن يكون ليه تأثير شويه علي عصبية الناس، الا ان الحقيقه اللي بشوفها كتير هي ان الكلام ده بيتاخد عند كتير من الأشخاص العصبيين كوسيله للهروب من مسئولية افعالهم و تصرفاتهم، و ان معظم الناس اللي متشخّصه كده لما بتكون في موقف محتاجين فيه انهم يمسكوا نفسهم بيمسكوها و بيتصرفوا بشكل طبيعي فيه احترام للآخرين و لنفسهم (او علي أسوأ الفروض بيكتموا عصبيتهم و مابيطلعوهاش علي الناس )
الخلاصه ...
لو انت شخص عصبي و شايف ان الناس لازم تستحملك علشان انت عصبي و "غَلّاط"، يبقي احسنلك تقعد لوحدك في البيت من غير ماتتعامل مع الناس لغاية ماتتعلم ازاي تعاملهم.
و لو انت اب او ام و الدكتور قالك ابنك عنده "اي حاجه " تخليه يتعصّب، ماتخليش ده حِجه علشان تدلعه و ماتعلموش يحترم الناس التانيه .. لأنه ممكن يتعلم يتعامل مع الناس بإحترام بردو بغض النظر عن "الحاجه اللي عنده"!
اما لو انت/انتي في علاقه مع حد و بيعاملك وحش و بيقل ادبه تحت مسمي انه مابيعرفش يمسك نفسه، علميه حدودك لغاية فين و خليه يعرف انه لو عدّاها لازم ياخد الباب في ايده و هو خارج!
الناس بتمسك نفسها لما تتعصب لما تكون عارفه ان حيبقي فيه رد فعل و توابع سيئه لتصرفاتها...إنما لو كل مره حد اتعصب عليك و انت استحملت و سكتت، تأكد أن ده حيحصل تاني و تالت ...
و العلاقات اللي مافيش فيها احترام للطرف الاخر.. او فيها تكرار اهانه من طرف لطرف تاني ... قلتها احسن!
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments