استشاره سريعه !

ساعات ناس بتبعتلي طالبه مني انهم يتكلموا معايا أو ياخدوا رأيي في حاجه في حياتهم محتاجين ياخدوا فيها قرار ..أو في استشاره نفسيه ... و علي الرغم من أني دائما (علي قد مقدرتي ) بحاول اني ارد عليهم أو اديهم جزء من وقتي علشان يسألوا الاسئله اللي هم عايزينها ، إلا أن المشكله اللي معظم الناس مش عارفاها أن الاستشاره اللي ليها علاقه بالمجال بتاعنا مختلفه اختلاف كبير عن الاستشاره اللي ممكن طبيب بشري يساعد بيها ...

الطبيب البشري ممكن لما تشرحله الأعراض بشكل دقيق، يقدر يقولك علي دواء معين تاخده لمدة أسبوع أو أسبوعين و تبقي تمام!... لأن أساس العلاج جي من بره ...عن طريق الدواء ... إنما موضوع العلاج النفسي ده موضوع اصعب بكتير أن الواحد يساعد فيه شخص عن طريق سؤال علي what's app أو مكالمة تليفون أو حتي سيشن أو اتنين.

لو مثلا حد جالي و قالي علي مشكله معينه و انا لقيت أن أساس المشكله هي علاقته بأمه ... ممكن الشغل علي الموضوع ده يكون محتاج وقت طويل و سيشنز كتيره علشان علاقته بيها تتغير أو نظرته ليها تتغير .

و حتي لو قولتله، انت محتاج تشتغل علي علاقتك بأمك و نظرتك ليها، دائما السؤال اللي بعد كده بيبقي "ازاي؟"...أو "اعمل ايه ؟"... و ده موضوع محتاج شغل من الشخص اكتر من اني أقوله (اقولها) روح احضن امك او اتكلم معاها في اللي مضايقك بس بطريقه كويسه... أو اني أقوله انت مش واقف في المكان الصح في علاقتك بأمك !.

الفكره أن تغيير نظره شخص للي ابوه و امه عملوه (أو ماعملوهوش) موضوع اصعب بكتير من شوية كلام ممكن يتقال في رد علي سؤال او في مكالمة تليفون ...(أو حتي في سيشن family Constellations ).

علشان كده، و علي الرغم من أن تشخيص المشكله ممكن يكون ساعات سهل و باين أصلها جي منين، إلا أن الحل بيبقي محتاج شغل كتير ...بيزيد أو يقل علي حسب مقاومة الشخص للعلاج، و رغبته في أنه يتخلي عن دور الضحيه ...

الكلام ده بقوله بس علشان الناس تفهم أن حاجه اتبنت بقالها سنين، غالبا مش حتتغير في كلمتين يتقالوا في التليفون ، أو حتي في سيشن او اتنين ... و ان كمان ساعات في طبقه (layer) بتتحل، و نلاقي تحتها طبقه تانيه محتاجه نشتغل عليها بعديها ...

مهما كان الشخص حاسس أنه بس محتاج حد يحطه علي أول الطريق و هو يجري ! 😊

May everyone find the peace they are looking for 🙏

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual