اسئله محتاج تسألها لنفسك!

Monir El-Shazly
Jun 17, 2018
2 min read

أسئلة محتاج تسألها لنفسك! (اعاده لبوست من سنتين) _______

كتير لما بأعمل تدريب او استشارات (سواء كان #coaching او training )… او حتي لما بتكلم في جلسات او محاضرات..دايما بقول ان الشخص محتاج يبص جواه..قبل ما يبص براه ( و طبعا ده مش كلامي انا..ده كلام اتقال من الاف السنين من تقريبا كل المعلمين الروحانيين و الرسل في كل الديانات!

و دايما باستغرب قوي من ان معظم الناس اسهل عندهم انهم يبصوا بره, و ينتقدوا #الحياه و اللي بيحصل فيها … و مابيسألوش نفسهم اسئله ممكن تبان بديهيه …اسئله ليها علاقه مباشره بيهم و بحياتهم!

و علشان كده..كتير بأعمل لسته فيها اسئله للناس اللي بشتغل معاهم ..محتاجيين يجاوبوها علشان يعرفوا نفسهم شويه , و يبتدوا ينقلوا تفكيرهم من بره…لجوه…علشان ما فيش حاجه بتتغير في الحياه…الا لو اللي جوه اتغير…

لو عايز تغير حياتك (او حتي المكان او البلد اللي انت فيها)…دي اسئله ممكن تساعدك

• انت عايز ايه من الحياة؟ • انت حاسس انك ناجح؟ • ايه اللي ممكن يخليك تحس انك ناجح؟ (ايه هو مفهوم #النجاح في وجهة نظرك؟) • لو انت عارف انك مش ممكن تفشل…حتعمل ايه؟ • انت شايف نفسك ازاي؟ • طيب….انت عايز تشوف نفسك ازاي؟ • ايه هي نقط قوتك الرئيسية؟ • لو انت استغليت نفط القوه دي في حاجه (او شغلانه) حتبقي ايه هي ؟ • ايه هي الحاجات اللي فيك و حاسس انك محتاج تغيرها؟ • انت حاسس انك مؤثر او مفيد للناس اللي حواليك؟؟ • طيب…ايه الحاجه او السلوك اللي بتعمله, و بيأثر في الناس ؟ و ايه هو نوع التأثير ده؟ • ايه هي المهارات بتاعتك؟ • ايه هي المهارات اللي انت عايز تنميها؟ • ايه الفرق بينك دلوقتي… و بينك من سنه فاتت؟ • ايه السؤال اللي محتاج تسأله لنفسك دلوقتي؟؟ • طيب…ايه حتكون اجابة السؤال ده لو سألته؟