احضنوا اهلكم!
- Monir El-Shazly
- Aug 8, 2017
- 1 min read
احضنوا اهلكم!
——-
في دراسات كتير طلعت بتتكلم علي اهمية ان الاب و الام يحضنوا ولادهم ، و علي ان الاحضان دي بتساعد علي افراز هرمونات النمو للاطفال اللي بتساعد علي نموهم البدني و العقلي… و النفسي السليم. و فيه دراسات تانيه (اقل) طلعت بتتكلم الي اهمية الاحضان بين الناس اللي بتحب بعض و علي قد ايه الاحضان بتساعد في انهاء الخلافات الزوجيه و تقريب وجهات النظر بين الطرفين. انما ماشفتش لغاية دلوقتي (للأسف) دراسات علي اهمية الاحضان بين الابناء و بين ابوهم و امهم، علي الرغم من انّي بشوف كتير في الشغل بتاعي قد ايه الابناء (مهما كبيروا) بيبقي كتير منهم عندهم امنية (ممكن من ايام الطفوله) ان اهلهم يحضنوهم ، و فيه ناس بتعيش حياتها كلها تدوّر علي حضن ابوها او امها اللي كان نفسها فيه و هي صغيره!. فيه اهالي كتير ماتربوش علي انهم يتحضنوا من اهلهم… و علشان كده ماكانوش بيحضنوا ولادهم و هم صغيرين… و علي الرغم من ان الاهالي دي بيستغربوا لما ولادهم يحضنوهم فجأه ( بعد ما بقول ولادهم انهم يعملوا كده) ..الا ان كتير منهم بعد شويه بيبتدوا يعبّروا لولادهم اكتر و بيبتدوا يقربوا منهم اكتر بعد كده. كلنا نفسنا حد يقولنا انه بيحبنا و يحسّسنا بكده. ماتخافوش تحضنوا اولادكوا.. ماتتكسفوش تحضنوا الناس اللي بتحبوهم… والاهم… احضنوا اهلكوا (و عبرولهم انكوا بتحبوهم).. قبل فوات الاوان!.
Commentaires