احضنوا ابوكم و أمكم .... و احضنوا اولادكم!
- Monir El-Shazly
- Aug 9, 2023
- 1 min read
احضنوا ابوكم و أمكم .... و احضنوا اولادكم!
(إعادة نشر)
-------
في دراسات كتير طلعت بتتكلم علي اهمية ان الاب و الام يحضنوا ولادهم ، و علي ان الاحضان دي بتساعد علي افراز هرمونات النمو للاطفال اللي بتساعد علي نموهم البدني و العقلي... و النفسي السليم.
و فيه دراسات تانيه طلعت بتتكلم الي اهمية الاحضان بين الناس اللي بتحب بعض و علي قد ايه الاحضان بتساعد في انهاء الخلافات الزوجيه و تقريب وجهات النظر بين الطرفين.
انما ماشفتش لغاية دلوقتي (للأسف) دراسات علي اهمية الاحضان بين الابناء و بين ابوهم و امهم (بالنسبه للأبناء بعد مابيكبروا)، علي الرغم من انّي بشوف كتير في الشغل بتاعي قد ايه الابناء (مهما كبروا) بيبقي كتير منهم عندهم امنية (ممكن من ايام الطفوله) ان اهلهم يحضنوهم، و فيه ناس بتعيش حياتها كلها تدوّر علي حضن ابوها او امها اللي كان نفسها فيه و هي صغيره ( و لما مابتلاقيهوش بتدور عليه عند ناس كتير)!.
فيه اهالي كتير ماتربوش علي انهم يتحضنوا من ابوهم و امهم... و علشان كده ماكانوش بيحضنوا ولادهم و هم صغيرين... و علي الرغم من ان الاهالي دي بيستغربوا لما ولادهم بيحضنوهم فجأه ( بعد ما بقول لأولادهم انهم يعملوا كده) ..الا ان كتير منهم بعد شويه بيبتدوا يعبّروا لولادهم اكتر و بيبتدوا يقربوا منهم اكتر بعد كده.
كلنا نفسنا حد يقولنا انه بيحبنا و يحسّسنا بكده. ماتخافوش تحضنوا اولادكم. ماتتكسفوش تحضنوا الناس اللي بتحبوهم... والاهم... #احضنوا_اهلكم (و عبرولهم انكوا بتحبوهم).. قبل فوات الاوان!.
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments