احسن حاجه اعملها لأولادي !

Monir El-Shazly
Aug 13, 2023
3 min read

مع ارتفاع نسبة الطلاق و الخلافات الزوجيه ، ناس كتير بتقوللي انها خايفه علي ولادها و نفسها توفرلهم حياه احسن من اللي هما عاشوها.... و بتسألني ايه اكتر حاجه ممكن يعملوها ليهم .

كتير من الناس بتضغط علي نفسها علشان تدخل ولادها مدارس كويسه و غاليه... و تعلمهم تعليم "انترناشيونال" ، حتي لو كان ده علي حساب انهم يضغطوا علي اعصابهم و مايناموش بالليل من كتر القلق علي مصاريف العيال و طلبات الدراسه و الكلام ده. ...و في احيان كتيره في ناس بتضطر (للأسف) تسافر بعيد عن ولادها و بيتها علشان توفر مصاريف الحياه و الدراسه ليهم!.

و في ناس تانيه ( و خصوصا الامهات) بيبهدلوا نفسهم وهم بيودوا العيال للتمارين و الدروس و يجيبوهم. و يومهم بيبقي متوزع بين الولد اللي محتاج يروح درس الجيتار و البنت اللي لازم تروح درس السباحه و الولد الصغير اللي محتاج اذاكرله علشان عنده ابتدائيه السنه دي!

و في ناس تالته بتفضل في جوازه مش عاجباها علشان الولاد يتربوا بين اب و ام "تحت سقف واحد" ، حتي علي الرغم من انهم مش طايقين حياتهم و لا قادرين يبصوا (مش حتي يتكلموا) مع اجوازهم او مراتاتهم.

و بغض النظر عن كمية الامراض اللي بتصيب الاهالي اللي ببعملوا كده ، و كم التعاسه و القلق و الضغط النفسي اللي بيبقوا عايشين فيه... المشكله هي ان الاولاد نفسهم ( اللي الاهالي فاكرين انهم بيضحوا علشانهم )؛ مابيطلعوش سعداء و في احيان كتيره بيبقوا مش ناجحين في الحاجات اللي اهاليهم ضحوا بحياتهم و سعادتهم علشان يوفروها ليهم.... يا تري ايه السبب؟

السبب ببساطه ان الاولاد بيطلعوا و عندهم نموذج الحياه من خلال تصرفات الاب و الام.... فلما الولاد بيلاقوا ان ابوهم او امهم (او الاتنين) مش سعداء في حياتهم ، بيتخزن عندهم في العقل الباطن ان ده هو نموذج الحياه ، و ان عادي اني ماكونش سعيد في حياتي و اني استحمل و ماغيرش حاجه فيها. ( ده طبعا غير الشعور الخفي بأنهم لازم مايطلعوش سعداء و يضحوا لولادهم بعد كده زي ما اهاليهم كانوا مش سعدا و ضحّوا) .

الحاجه التانيه هي ان لما الاهالي بيضحوا علشان خاطر ولادهم تضحيات كبيره، بيقي فيه نوع من انواع الضغط (حتي علي المستوي الغير محسوس او متعبر عنه) من الاهل علي الاولاد انهم "لازم" يكونوا عند حسن الظن بيهم و يحققوا حلم اهاليهم فيهم. و ده في حد ذاته بيشكل ضغط نفسي كبير علي الاولاد و في غالب الاحيان مابيقدروش يتعاملوا معاه و بيتمردوا!.

الحاجه التالته كمان ارتفاع نسب الاصابه بأمراض الضغط و القلب والسكر ...و التوتر و ال panic attacks عند ناس لسه في العشرينات أو التلاتينات من عمرها.... و طبعا الناس دي مش واحده بالها من كم الضغط النفسي و التوتر اللي هي حطّاه علي نفسها ..و طبعا التوتر ده بيتصدر لأولادها بشكل أو بآخر !

كمان لازم نحط في اعتبارنا حاجه مهمه جدا، و هي ان وجود الاب و الام في حياة الاولاد (سواء كانوا متجوزين او منفصلين) بشكل مستمر و فيه احترام ببن الطرفين ، "اهم مليون مره " من المدارس الانترناشيونال و ال iPhone و العربيه الجديده.!.

كل الاولاد التعساء اللي تصرفاتهم او اسلوب حياتهم فيه تطرّف بيبقي سببه بشكل مباشر بعدهم عن اهلهم و عدم شعورهم بالحب (او التقبّل) منهم.

الخلاصه هنا انكم لو عايزين ولادكوا يبقوا ناس اسوياء...اشتغلوا علي نفسكم و علي سعادتكم و سلامكم النفسي الاول ، علشان ده هو "المثال" اللي ولادكم بيفهموا الحياه من خلاله.

كمان ماتنسوش انكوا تبقوا قريبين منهم... و تحبوهم من غير ما تربطوا الحب ده بدراسه او تفوق رياضي او اجتماعي.

حسسوا ولادكم انكوا بتحبوهم و فخورين بيهم و بشخصيتهم و باهتماماتهم... استمتعوا بولادكم و هم بيكبروا بدل ماتبقي العلاقه بينكم عباره عن " اخبار المدرسه ايه؟" و " ليه انت لابس كده ؟" و "انا مش حجيب ال iPhone الجديد الا لما تنجح و تطلع الاول ".

لو عايز ولادك يكونوا سعدا..... اشتغل علي سعادتك.... و بيّنلهم انك سعيد بيهم و بتحبهم....!

(إعادة نشر)

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual