You don't need to be loved by everyone!
- Monir El-Shazly
- Jul 9, 2023
- 2 min read
مش مهم الناس كلهم يحبوك أو يرضوا عنك!
------
زمان و انا صغير.. كان بيلفت نظري الكلام اللي من نوعية "الانسان ايه غير سمعته؟".... و "الناس حتقول عليك ايه؟ ".
و الحقيقه انا عشت جزء (الحمد لله مش كبير) من عمري خايف من كلام الناس و بحاول ارضيهم ... لغاية ما اكتشفت انّي مش محتاج اعمل كده.... و ده كان واحد من اكبر نقط التحول في حياتي!.
الحقيقه ان الناس اللي بتتكلم عنك كويس انهارده علشان كلامك و افعالك و قناعاتك عاجباهم ..همّ نفس الناس اللي ممكن تتكلم عنك وِحِش بكره لو ارائك او افعالك خالفت رأيهم و توقعاتهم منك!.
علشان كده لازم الواحد يسأل نفسه ، "هل انا محتاج أبني سعادتي علي رأيهم.... اللي ممكن يتغيّر بين يوم و ليله؟"
لو سألتوا ناس عليا... ممكن تلاقوا ناس بتتكلم عني كويس جدا... و ممكن بردو تلاقوا ناس مابتحبّنيش و ناس تانيه ممكن تكون شايفاني مختلف بشكل مش عاجبهم...
ناس ممكن تكون معتبراني شخصيه مُلهِمه ليهم ... و ناس تانيه ممكن تكون معتبراني انسان أفكاره خطيره، و ممكن يخافوا منه!
طب انا مين فيهم ؟... الحقيقه اني شخص فيه حاجات كويسه...و اكيد فيه حاجات لسه محتاج يشتغل عليها... اكيد عملت حاجات كويسه في حياتي... و اكيد عملت حاجات ممكن تكون ضرّت حد في يوم من الايام (حتي لو فيه حاجات منها انا مش عارفها او ماكنتش واخد بالي و انا بأعملها!)
احنا مش محتاجين نكون كاملين( perfect )... و لا محتاجين ننول رضا الناس كلها .. لأن ده عمره ما حيحصل...
ولا حتي محتاجين نقنع الناس بأفكارنا (حتي لو كنا متأكدين انها صح و حتفيدهم)
ولا حتي محتاجين نظهر بشكل مثالي قدام اهلنا... لأنهم غالبا حيفضلوا يحبونا (في معظم الأحيان) حتي لو كنا مش كاملين الاوصاف (و حتي لو كنا مش فاكرين كده :-) )
بدل ما تسجن نفسك في سجن "الناس حتقول ايه؟".. اطلع بره السجن و خليك صريح مع نفسك. اِقبل نفسك و حاول تطوّرها لو محتاحه تطوير...
خلي علاقتك بربنّا مبنيه علي اللي انت حاسس بيه... مش اللي اتقالك عليه! ...
اعرف ربنا معرفه شخصيه.. بدل ما تسمع عنّه من الناس...
ِحب نفسك و اتقبلها ... لأنك عمرك ما حتعرف تحب الناس بجد.. لو انت عايش في سجنهم!
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments