Under the name of God!
- Monir El-Shazly
- May 13, 2024
- 2 min read
كان فيه بوست ليا كاتبه من زمان اتكلمت فيه علي ازاي الايجو Ego (الهويه المزيفه للنفس) عند الناس في القرون الوسطي خلاهم يفتكروا أن الأرض هي محور الكون ...
نفس الايجو ده هو اللي مخلي ناس مقتنعين أن "ربنا" اللي خلق الكون ده كله ...و خلق فيه كره ارضيه صغيره جدا (في نظام شمسي صغير جدا، في مجره من المجرات المتوسطه الحجم، في كون غير محدود) و خلق ٧ مليار شخص عايشين فيها، ممكن يكون خالق اكتر من ٥ مليار منهم مالهومش لازمه و حيرميهم في النار بعد ما يموتوا و ان حوالي مليار بس من الناس دي بس حيدخلوا الجنه (علشان مسلمين)...
للاسف الشعور بالافضليه ده موجود في معظم الديانات مش بس في الديانه الاسلاميه ... و ده واحد من أهم أسباب الحروب في العالم ...من بداية ظهور الديانات في التاريخ و لغاية دلوقتي ...
إنما المؤلم اكتر بقي أن حتي فكرة الرحمه و الترحُّم علي الناس، اتشالت من عند ناس كتيره... و ابتدأ تتكلم (بالنيابه عن ربنا) و تقول مين تجوز عليه الرحمه ...و مين ماتجوزش عليه ...و مين حيدخل الجنه و مين لأ!
مش فاهم ايه نوعية "فَهم الناس للدين أو حتي لربنا" اللي ممكن تخلي الناس تتخلي عن مفاهيم الرحمه و الانسانيه ، في الوقت اللي فيه لما بتبتدي تقرا الفاتحه بتقول بعد اسم ربنا "الرحمن الرحيم" ...
عقل مين و قلب مين اللي ممكن يتخيل أن الدين (اللي جاي من عند ربنا) ممكن يطلب من الناس أنها تتخلي عن الرحمه ... اللي اصلا هو حطها اول حاجه بعد اسمه!
ياريت الناس اللي عارفه مين اقرب لربنا من مين، و مين كلامه صح و مين كلامه غلط، و مين حيدخل الجنه و مين حيدخل النار...
الناس اللي عندها الحقيقه المطلقه ... مايقولولناش ...و مايحرقولناش المفاجأه!
*إعادة نشر
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comentarios