Questions to ask yourself !
- Monir El-Shazly
- Jun 17, 2023
- 2 min read
أسئلة محتاج تسألها لنفسك!
___
كتير لما بتكلم في جلسات او قعدات أو حتي لما بأشتغل مع حد ..دايما بقول ان الواحد محتاج يبص جواه، قبل ما يبص براه ( و طبعا ده مش كلامي انا..ده كلام اتقال من الاف السنين من تقريبا كل المعلمين الروحانيين و الرُسُل في كل الديانات:) )
بس دايما معظم الناس اسهل عندهم انهم يبصوا بره، و ينتقدوا #الحياه و اللي بيحصل فيها ... و ينتقدوا الناس التانيه ... و مابيسألوش نفسهم اسئله ممكن تبان بديهيه ...اسئله ليها علاقه مباشره بيهم و بحياتهم!
و علشان كده بأعمل لسته فيها اسئله للناس لما بأبتدي اشتغل معاهم ، الاسئله دي محتاجيين يجاوبوها علشان يعرفوا نفسهم شويه , و يبتدوا يوجهوا تفكيرهم من بره...لجوه...علشان *ما فيش حاجه بتتغير في الحياه...الا لو اللي جوه اتغير*...
لو عايز تغير حياتك (او حتي المكان او العلاقه اللي انت فيها)...دي عينه من الاسئله اللي ممكن تساعدك
• انت عايز ايه من الحياة؟
• انت حاسس انك ناجح؟ و هل حاسي انك سعيد بحياتك؟
• طيب ايه اللي ممكن يخليك تحس انك ناجح؟ (ايه هو مفهوم #النجاح في وجهة نظرك؟) - لأن المفهوم ده ممكن يتغير مع الوقت!
• لو انت عارف انك مش ممكن تفشل في اي حاجه حتعملها ...حتختار تعمل ايه؟
• هل انت راضي عن نفسك؟
• طيب....لو مش راضي، ايه اللي محتاج تغيره؟
• ايه هي نقط قوتك الرئيسية؟
• لو انت استغليت نقط القوه دي في حاجه (او شغلانه) حتبقي ايه هي ؟
• هل انت حاسس ان وجودك مؤثر او مفيد للناس اللي حواليك؟؟
• طيب...ايه الحاجه او السلوك اللي بتعمله، و بيأثر في الناس ؟( بشكل إيجابي ..او بشكل سلبي)
• ايه الفرق بينك دلوقتي... و بينك من سنه فاتت؟
. ايه الحاجه اللي نفسك (او كان نفسك) تقولها لأبوك أو امك و ماقولتهاش لغاية دلوقتي ؟
• هل انت سعيد في حياتك ؟؟؟ ... و لو الجابه لأ ..ايه اللي ممكن تعمله علشان تبقي اكتر #سعاده؟؟
لو فيه اسئله كتيره هنا مش لاقيه اجابه، يبقي انا محتاج ابص جوه نفسي اكتر!..
و لو اجابات كتيره، مش مستريح ليها، يبقي يمكن محتاج اخد خطوات لتغيير حياتي ابتداء من دلوقتي ! ( مش اندم علي اللي حصل أو اللي محصلش)
حياتك ..هي عباره عن مرايه للي بيحصل جواك.... لو عايز الحياه يبقي شكلها حلو...اتأكد ان المرايه نظيفه!
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments