On women !
- Monir El-Shazly
- Jul 24, 2023
- 1 min read
فيه رجاله معجبين جدا بحديث (مش متأكد هو ضعيف ولا لأ ) بيقول ان "الستات ناقصات عقل و دين". و بيقولوه في كل مناسبه علشان يحَقّروا من الستات و ارائهم.
و رغم أن فيه تفسيرات كتيره للحديث ده، إلا أن رجاله كتيره شايفينه دلاله علي أفضلية الذكور علي الإناث ... و علي أهمية تفكير الراجل و حكمته، بالمقارنة بتفكير الست و عقلها!
لو انت شايف ان الست اللي علمتك ازاي "تدخل الحمام" و تمسك المعلقه و انت صغير و كَبَرِتك و ربتك و عرفت منها يعني ايه ربنا و يعني ايه صلاه ....لو انت شايف ان الست دي ناقصة عقل و دين... يبقي يا تري اخبار دينك و عقلك انت ايه ؟
الناس اللي بتقول المرأه نص المجتمع.... #المرأه مش بس نص المجتمع... المرأه تلات ارباع التربيه.
و حتي في علم النفس ... معظم مشاكل الناس بيبقي الاصول بتاعتها جايه من علاقتهم باهلهم...و خصوصا امهم.
المجتمعات اللي مابتحترمش المرأه هي مجتمعات فيها مشاكل متأصِله (لأن المرأه هي اساس التربيه) ... و الولاد اللي ماببحترموش #الستات (من وهمّ صغيرين) من الصعب جدا انهم يطلعوا رجاله اسوياء في تصرفاتهم لما بكبروا.
احترموا بناتكم و علموهم انهم مش اقل اهميه من ولادكم و انهم مش مجرد (حتة لحمه) الرجاله عايزاها او حاجه ملفوفه في ورق سوليفان تتحرك من بيت ابوها لبيت العَدَل .
لو البنت ماعندهاش ثقه في نفسها و في تفكيرها و في اختياراتها ، ازاي حترّبي اطفال عندهم ثقه في نفسهم.
احترموا بناتكم... و خلوهم فخورين بانوثتهم ...و بالدور بتاعهم في الحياه!
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
留言