On divorce !
- Monir El-Shazly
- Jun 1, 2024
- 2 min read
في فكره مش صحيحه عند ناس كتيره، أن الطلاق معناه "فشل"...
مش نهاية علاقه، إنما فشل للشخص في أنه يخليها تنجح! ...
و أن الست الشاطره، هي الست اللي تقدر تحافظ علي بيتها ...حتي لو كان ده علي حساب صحتها و سعادتها!.
التصوّر ده بيزوده كلام بعض الافلام و المسلسلات عن أن الست الكويسه هي الست اللي بتضحّي و أن الست اللي في علاقه مؤذيه نفسيا ليها و عايزه تخرج منها، دي ست نمروده و مش عاجبها النعمه اللي هي فيها!
طبعا النظره دي هي السبب الأساسي في عدم احترام الست لنفسها و شعورها بإنعدام الثقه، لأنها "ماعرفتش تحافظ علي بيتها"!
مش بس كده، كمان التصوّر ده بيخلّي رجاله كتير تتمادي في أهانة الست نفسيا ... او تتمادي في عدم تحمٌل المسئوليه ، لأنها شايفه ان "نجاح العلاقه هي في الأساس مسئولية الست".
طبعا الكلام ده بيودي في داهيه بعد كده ...لأن الست بتحس أنها مقهوره علي وضع مش عاجبها فبتطلّع مشاكلها في اولادها، و بتطلّع اولادها (الرجاله) عليهم حمول كتيره من التوقعات (لأن ابنها هو الراجل اللي طلعت بيه من الدنيا بعد ما ابوها و جوزها خذلوها) ...طبعا الكم ده من التوقعات بيخليها تدلّع اولادها (الذكور) و تفضلهم عن البنات، و ده بييجي بنتيجه عكسيه ان الاولاد بيطلعوا مش ناضجين كفايه ، و عندهم شعور بالانانيه و بأن طلباتهم لازم تبقي مُجابه، و غالبا بيبقوا اول ناس عايزين يسافروا و يسيبوا البيت و يشيلوا ايدهم من المسئوليه !
مش بس كده، التفضيل ده كمان بيطلع مجتمع من البنات (اللي حيبقوا ستات بعد كده) حاسين بفقدان الثقه في نفسهم و كانوا يتمنوا يكونوا رجاله، لأنهم شايفين أن أهلهم (و خصوصا الام) مفضلين اخواتهم الرجاله علشان هم *ذكور* !
إنما الحقيقه البسيطه اللي ممكن تحل المشاكل ده كلها هي معرفة أن نجاح أي علاقه هو مسئوليه مشتركه بين الطرفين، و ان نهاية أي علاقه هي ببساطه مش فشل، إنما فرصه لأن الواحد يتعلم من أخطاءه، و يشتغل علي نفسه و يطورها ...
و علي فكره، ابحاث كتير اتعملت و لقوا فيها ان الطلاق لما بيحصل بين اتنين بإحترام (او بمشاكل قليله و بيتم تسويتها)، بيبقي احسن بكتير للأولاد من الحياه في بيت واحد مع ام و اب بيكرهوا بعض او بيتخانقوا مع بعض علي طول!
و علي فكره بردو، من خبرتي الشخصيه و من حالات كتيره بشوفها، علي عكس ما ستات كتير فاكره، مش كل الرجاله لما بتطلق بتبطل تصرف علي اولادها، إنما ساعات كتيره من كُتر ما العلاقه قعدت بايظه كتير، الموضوع بيقلب عِند لما بييجوا يتطلقوا، و طبعا اول حاجه الناس بتعند فيها، الفلوس ..حتي لو علي حساب الاولاد!
الخلاصه... لو انت ركبت اتوبيس علشان تروح مكان معين، و اكتشفت أنه مش حيروح هناك، قُعادك زياده في الاتوبيس الغلط، مش حيغير حقيقه أنه مش رايح في المكان اللي انت عايزه !
و ده مش معناه انك *فشلت* في اختيار الاتوبيس، إنما معناه ان وعيك زاد و *نجحت* في انك تعرف انك ماشي في الاتجاه الغلط!
(إعادة نشر)
*الكلام ده ينطبق علي الرجاله بردو ...رجاله كتيره عايشه في جوازات مؤذيه ليها نفسيا ، و حاسه انها مجرد "مكنة فلوس"للست و للاولاد ... انا بس بتكلم علي السيناريو اللي موجود اكتر !
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments