Never feel sorry for yourself!
- Monir El-Shazly
- Feb 24, 2024
- 1 min read
بقالي مده كبيره شايف أن ال Facebook بعد ما كان بقي صفحة وفيات، زاد عليه كمان أن بقي فيه جو صعبانيات كبير جدا ...
أي حد بيعمل حادثه، او بيحصله مشكله ، او حد قريبه من بعيد صباعه بيوجعه، الاقيه كاتب علي الموضوع "الكبير" ده، او مصوّر نفسه و هو راقد علي السرير، او و عربيته متكسره ...
ده غير الشكوي العامه اللي عند الناس بصعوبة الحياه و ارتفاع تكاليف المعيشه كل يوم ...
جو الصعبانيات ده غير أنه خلي ال Facebook سخيف، كمان التعود علي الجو ده بيخلي الواحد دائما مكتئب و دائما صعبان عليه نفسه... و دي واحده من اكتر الحاجات اللي "الايجو ego" (الهويه المزيفه للنفس) بتاعنا بيلعب عليها.
فكرة اني يصعب عليا نفسي، و اني ابقي دائما مركز في المشاكل اللي عندي ( بدل ما احمد ربنا علي النعم اللي في حياتي)، و الجو بتاع اني استني اليوم اللي "ربنا حيستجيب فيه ليا" ده، حيخليني دائما مكتئب، و حيخلي نظرتي لحياتي عباره عن سلسله من المآسي و الفُرص الضائعه ...او الفُرص اللي لسه ماجاتش!.
واحده من اشهر العاب الايجو (ego)...أنه يصور للإنسان أنه ضحيه و يخليه يصعب عليه نفسه أو يخليه "مستني حاجه تحصل" علشان يكون سعيد ... و لما ده بيبقي اسلوب حياه ...الحياه عمرها ما بتتحسن!
انا عارف ان الدنيا فيها صعوبات كتيره الايام دي، و ان الحاله العامه مأثره علينا كلنا، بس محتاجين ناخد بالنا أن الايجو مايلعبش ألعابه علينا ...
الايجو ده حِمل كبير..و كل ما حيكبر ..حيتعبنا و احنا شايلينه!
نعامل نفسنا كويس...اه ...
نبقي حنينين مع نفسنا ... طبعا ...
إنما يصعب علينا نفسنا ... بلاش!
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Photo credit: unknown
Comments