Let go ...and free yourself!

اتخلي ...و عيش سعيد

Let go ...and free yourself!

------

بعد كلامي امبارح علي خطورة مفهوم #التعلق #attachment , و اد ايه القدره علي التخلي عن الحاجات giving up things بتدينا قوه كبيره و بتأثر بشكل مباشر علي قدرتنا علي الاستمتاع بالحياه ... قررت اعيد نشر مقال كنت كتبته عن مجموعه من الحاجات اللي لو قدرنا نستغني عنها ممكن تدينا قدر أكبر من الحريه و السعاده في الحياه!

الحاجات دي ممكن التخلي عنها يكون صعب، و ممكن مانقدرش نتخلي عنها كلها مره واحده، إنما واحده واحده حنلاقي أن الموضوع بقي اسهل ...و ان كتير من حمولنا اللي شايلينها علي ظهرنا حتبتدي تبقي اخف !

1. اتخلي عن حاجتك انك تكون دائما على حق (و تقنع الناس بكده)

2.اتخلي عن حاجتك انك تكون دايما مُسيطر (علي حياتك، علي اولادك... او علي اي حد)

3. اتخلي عن #اللوم.

عن لوم الناس التانيه، لوم شريكك في الحياه... لوم الظروف... لوم ولادك علي اختياراتك في الحياه علشان فاكر ان كده في مصلحتهم – حتي لو ماعبرتش ليهم عن اللوم ده ...

4. اتخلي عن النظر لنفسك او لحياتك بشكل انهزامي و تَصور انك ضحيه! - "#العقل هو أداة رائعة إذا استخدمته صح، انما لو استخدمته غلط ،ممكن يبقي اداه مدمرة " - ده مش كلامي، ده كلام إيكهارت تول Eckhart Tolle

5.اتخلي عن قناعاتك القديمه عن ايه اللي ينفع و ايه اللي ماينفعش... ايه اللي ممكن، و ايه اللي مش ممكن. حاجات كتيره ممكن تبان صعبه، و بتبقي اسهل لما نبتدي!

6.اتخلي عن #الشكوى. بدل ما تشتكي...شوف ازاي ممكن تغير حياتك...او تغير نظرتك لحياتك، و ابتدي من دلوقتي!

7.اتخلي عن #النقد.

بدل ماتنقد الناس التانيين، و حياتهم و طريقة تفكيرهم... وفر طاقتك لنفسك. الناس السعيده ماعندهاش وقت تنتقد الناس التانيه...لأن وقتها بتقضيه في الاستمتاع بالحياه!

8. اتخلي عن مقاومتك للتغيير (او الخوف منه ). لأن الحاجه الثابته في الدنيا هي التغيير... و علشان هو حيحصل حيحصل...امشي معاه بدل ما تمشي ضده!

9. اتخلي عن حاجتك انه تسمّي كل حاجه ... و تحطها في اطار معين... علشان تحكم عليها . (مش كل الناس عندها نفس المفهوم عن الحب، أو الصداقه أو الامانه او حتي عن ربنا!... مُسَمَيات الحاجات مش هي حقيقتها !)

10. اتخلي عن أعذارك اللي بتستخدمها علشان تقنع نفسك ان حاجه مش ممكنه او صعبه

11.اتخلي عن الماضي اللي فات ...لأن عمرك ما حتروح هناك تاني . الحظة دي (الحاضر) هي كل اللي عندك.... استمتع بيها ... و اشتغل منها علشان تغير حياتك.

12. اتخلي عن رغبتك في التعلق بأي حاجه او حد . التعلق بييجي من #الخوف ..اما #الحب الحقيقي ...فهو حب غير مشروط. - غير مشروط بمده... بشكل... أو بتَوَقُع منك ان الشخص او الحاجه اللي بتحبها تفضل علي طول زي ما هي. علي عكس ما ناس كتيره فاكره، الناس اللي بتقدر تحب من غير ما تتعلق هي اكتر ناس عندها سلام نفسي و سعاده في علاقاتها.

13. اتخلي عن تعريفك لنفسك من خلال شغلك، مكانك، ديانتك، عربيتك، مستواك العلمي...نجاحك او حتي فشلك في حاجه! ... الحاجات دي كلها أدوار انت بتلعبها.... بس انت الشخص اللي بيلعب الأدوار دي! و كل ما تعرَّف نفسك من خلال ادوارك دي بس (أو تعمل لنفسك هويه منها)، كل ما حتحس بالخوف و كل ما #الايجو بتاعك حيسيطر عليك!

14. اتخلي عن شعورك بالمسئوليه عن الناس التانيه (أو عن اختياراتهم في الحياه!).

الناس الوحيده المسئوله منك مسئوليه تامه هم اولادك و هم صغيرين ... و بعد كده المسئوليه عنهم بتقل مع الوقت لما يكبروا... إنما شريك حياتك انت مش مسئول عنه ( انتوا بس مسئولين مسئوليه مشتركه عن حياتكم مع بعض و عن اولادكم)... غير كده أن مش مسئول عن قارارت حد تاني في الحياه ( حتي لو فاكر انك بتعرف اكتر منه أو فاهم #الحياه اكتر منه)

ده مش معناه انك ماتساعدش حد لو احتاج مساعده او ماتنصحش حد لو طلب منك النصيحه، أو معناه انك ماتساعدش أهلك لما يكبروا ، إنما فيه فرق كبير بين اني اساعد (to help or #support ) و بين اني احس بالمسئولية عنهم أو عن قراراتهم ( #responsibility )....

لأن تحمّل #المسئوليه معناها ان يكون من حقك انك تاخد قرار، إنما لو بقيت مسئول عن حد مش دورك انك تاخد القرار بالنيابه عنه، حتبقي ببساطه بتبوّظ علاقتك بيهم و ...بتجنن نفسك !

15. و اخر حاجه...اتخلي عن التوقعات ( #expectations )! ... توقعاتك من الناس (المفروض يعملوا ايه و مايعملوش ايه) و اتخلي عن انك تعيش حياتك حسب توقعات الناس منك!

انت مش محتاج تثبت حاجه لحد، لا لأهلك و لا لشريك حياتك و لا لأصحابك و لا لأي حد... انت الوحيد اللي ممكن يعرف ايه المناسب ليك دلوقتي، و ايه الطريق اللي انت محتاج تاخده. اسمع للناس التانيين، بس دايما اتأكد ان الصوت اللي جواك عالي و مسموع ... و صَدَّقُه 😇

(إعادة نشر)

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual