How to know which therapist/coach to go to ?
- Monir El-Shazly
- Mar 13, 2023
- 3 min read
بعد الكلام اللي كتبته من يومين عن الحاجات اللي الشخص محتاجها قبل ما يشتغل في موضوع العلاج النفسي أو الكوتشينج ...ناس كتيره لقيتها كاتبه عن أهمية أن الواحد يروح لحد يكون مُعتَمَد او معاه شهاده، و ناس كمان قالت إن المفروض يبقي فيه هيئه رقابيه علي المعالجين النفسيين و مدربين الحياه علشان الناس تعرف الكويس من الوِحِش ....
و مع احترامي للكلام ده، إلا أني ماقدرش اقول اني متفق معاه بشكل كبير ...
اولا ، فكرة ان الشخص درس كورسات أو اخد شهادات من منظمه او هيئه دوليه، ماتعنيش خالص أنه معالج نفسي او كوتش كويس ... ده بس معناه أنه "دَرَس" و أخد معلومات، إنما مش معناه أنه حيعرف يستخدمها في الشغل بتاعه...( فيه ڨيديو كنت عملته عن "الفرق بين زيادة المعرفه، و تطور الوعي" بيشرح الكلام ده، ححط اللينك بتاعته في اول تعليق !. )
الحاجه التانيه كمان أن كتير من نظام التعليم ، سواء الأكاديمي او الغير اكاديمي بيغلب عليه الطابع التجاري ، و علشان كده فكرة انك تكون "مُعتَمَد" من هيئه أو منظمه حتي لو كانت دوليه، معناها بس أن الشخص درس المناهج بتاعت المنظمه دي، إنما مش بالضروره تعني أنه حيعرف يفيد الناس (او حتي نفسه) بإللي درسه... ناس كتيره بتخش مكتبها (في مختلف المجالات)، و تلاقي الحيطان متغطيه من كتر الشهادات اللي اخدوها، و ماتستفيدش منهم باي حاجه، و في أحيان كتيره بتلاقي كل تعليمهم ده مجرد شهاده علي الحيطه!.
الحاجه التالته، فكرة أننا نعمل "هيئه رقابيه" علي المعالجين و مدربين الحياه، هي حاجه شبه فكرة أننا نعمل فحص نفسي للناس المقبلين علي الزواج ...مجرد فلوس رايحه في الهوا ، لأن الموضوع حيقلب في الآخر ل شهاده حندفع فلوس فيها علشان نطلعها !.
طيب ايه الحل؟
في وجهة نظري أن كده كده، السوق حيغربل نفسه و الناس الكويسه هي اللي حتفضل ... حتي لو ده اخد وقت شويه ...
و من ناحيه تانيه، الشخص اللي ناوي يشتغل علي نفسه محتاج يدّي اهميه كبيره لأنه يروح لحد ناس يعرفهم راحتله قبل كده ، و جاب معاهم نتيجه، و مايسترخصش في نفسه ثمن العلاج أو المشوار الكبير!
و كمان محتاج أنه يثق في "شعوره" و هل هو مستريح لما بيروح لشخص معين ولا لأ.
ناس كتير معاهم شهادات كبيره و كتيره و عملوا كوارث في ناس راحتلهم، و ناس كتير معاهم شهادات عددها اقل او درسوا كورسات اقل، إنما عندهم استعداد للنوع ده من الشغل ( و عندهم مجموعه كبيره من النقط اللي كنت ذكرتها في البوست اللي كتبته من يومين) .
كمان مهم قوي أن الشخص مايروحش لأكثر من حد في وقت واحد ... إنما لو قعد شهرين تلاته بيروح لحد من غير ما يبدأ يتحسن، يبقي غالبا ده معناه أن الشخص ده مش مناسب ليه ...
و لازم يعرف أن طريق العلاج النفسي كتير بيبقي فيه شغل علي حاجات صعبه، أنما لو اشتغل عليها و حلها، شكل الحياه كلها و شكل علاقته و النمط بتعاعها كله بيتغير!.
حاجه تانيه مهمه ممكن تساعد علي معرفة الشخص اللي ممكن اروحله، اني اتفرج علي نمط حياته، و الطريقه اللي بيتكلم بيها و بيتعامل بيها مع الناس .
الشخص اللي نمط حياته مش متوافق مع الكلام اللي بيقوله يبقي غالبا شغله حيبقي سطحي (لأنه مانجحش أنه يفيده هو)... و الشخص اللي مش بيحترم الناس، غالبا حيبقي عنده احكام علي الناس اللي بتروحله ...
و الشخص الغضبان (اللي بوستاته دايما غضبانه)، غالبا مش حيقدر يساعدك توصل للسلام النفسي ...لأنه هو نفسه مش عارف يوصلّه !
و اخر حاجه محتاج اقولها...ان زي ما لما التلميذ بيبقي مستعد، المدرس بيظهر ( when the student is ready, the teacher appears) ...
لما الشخص بيكون مستعد، حيلاقي المعالج المناسب ليه أنه يشتغل معاه ...
إنما لما الشخص بيكون مش مستعد( او عنده مقاومه للتغيير) حيلاقي اسباب كتيره تمنعه أنه يشتغل علي نفسه، او حيروح لحد مش حيقدر يساعده !
البدايه دائما بتيجي من الشخص نفسه ...و قوة نيته في أنه يشتغل علي نفسه !
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
留言