Family constellations

Monir El-Shazly
Aug 7, 2023
3 min read

كنت عملت ڨيديو من حوالي اسبوع علشان ارد علي استفسارات كتيره جاتلي علي طريقة ال family constellation (او ممكن نسميها ديناميكية نظام العائله)... السبب في ده غالبا هو مسلسل تركي اسمه #Another_self بيتعرض علي Netflix ، و المسلسل ده و لأول مره بيبيّن الطريقه العلاجيه دي و ازاي ليها تأثير كبير علي حل مشاكل معينه (نفسيه و عضويه)، ممكن يكون السبب بتاعها اعمق بكتير من حاجات احنا مرينا بيها أو فاكرينها بعقلنا الواعي ...

و علشان الطريقه دي جديده بالمقارنه بطرق علاجيه كتيره تانيه ، انا ححاول اجاوب علي شوية اسئله تانيه جاتلي عليها

١- مكتشف الطريقه دي هو برت هيلينجر (Bert Hellinger) ، و ده كان اخصائي نفسي الماني عاش في فتره من حياته في جنوب افريقيا ... و أتأثر بطرق علاجيه موجوده هناك و في أماكن تانيه، و حط الأساس بتاع العلم ده.

برت هيلينجر في رأيي شغله علي نفس درجة العمق بتاع فرويد و كارل يونج ...ان ماكانش أعمق .

٢- الأساس بتاع الطريقه دي أن احنا كلنا مرتبطين بأهلنا (و العائله بتاعتنا) ارتباط وثيق جدا ، الارتباط ده علي مستوي اعمق بكتير من مستوي العقل الواعي، و مالوش علاقه احنا بنحبهم و لا لأ... و حتي في معظم الأحيان بنبقي مرتبطين اكتر بالناس اللي لينا عليهم أو علي شخصيتهم أو طريقة حياتهم تحفظات كتيره!

و كتير من المشاكل النفسيه (و احيانا العضويه)اللي بنمر بيها ليها علاقه مباشره بالارتباط ده.

فك الارتباط ده ( او العقد دي) بيتعمل عن طريق ال family constellation و بيحصل لما بنحترم الناس دي و نحترم اختياراتهم (حتي لو انا مش متفق معاها)، و نبطل نحكم عليهم و علي نمط الحياه اللي اختاروه... او الحاجات اللي ممكن يكونوا مروا بيها (حتي لو انا مش عارفها)

٣- ازاي الطريقه دي بتشتغل ( ازاي الناس بتحس بحاجات زي ما ظهر في الجلسات في المسلسل التركي ) صعب قوي أنه يتشِرح.... بيرت هيلينجر نفسه سماه "ظاهره"، بس هو أقرب ما يكون لأن احنا بنحس بالطاقه بتاعت الناس ، و بنفهم حاجات عنهم اكتر من خلال الطريقه دي .

المسلسل بين الطريقه دي بشكل كويس، إنما كان فيه شوية أخطاء بسيطه في طريقة تطبيقها اللي ظهرت في المسلسل.

٤- الطريقه دي في رأيي مفيده لاي حد عنده مشاكل عضويه او نفسيه، إنما مش اي حد يقدر يشتغلها...

بيرت هيلينجر نفسه كان بيقول أن الموضوع مش موضوع معلومات و كورسات ممكن ناس تدرسها، لازم الشخص (المعالج) يبقي علي قدر معين من الوعي (علشان يقدر يشوف الصوره من فوق) و مايكونش بيصدر احكام خالص ... و الاهم ..ان يكون عنده تعاطف و احترام ...إنما مش عطف علي الناس اللي حتجيله!.

و علشان كده، في رأيي أن جميل أن ناس كتيره تدرس الطريقه دي و تفهم أساس العلاقات بيها، إنما مش كل واحد ممكن يبقي مُعالِج بيها!

٥- الطريقه دي معترف بيها علي مستوي العالم و منتشره جدا في المانيا و اوروبا الشرقيه و الغربيه..و في امريكا اللاتينية...و موجوده في مصر ... و فيه ناس كتيره اعرفهم بيشتغلوا بيها... و فيه ناس منهم كويسين جدا ...

٦- الطريقه دي هايله في التعامل مع حاجات كتيره، إنما المشكله فيها أن مستوي وعي الشخص اللي بيعالج بيها (the constellator or the space holder ) بياثر بشكل كبير جدا علي نجاحها ... كمان فهم اساسيات علم ال family constellation و ال orders of love شرط أساسي لأن المعالج يقدر يشتغل بيها!

المشكله ان لو المُعالج ( the constellator ) الايجو بتاعه دخل في الموضوع ، فممكن تلاقي أن فيه شوية افتراضات أو توقعات هو حس انها موجوده في السيستم بتاع الشخص اللي جايله، و ابتدي يبني تحليله للموضوع بناء عليها ..و ده في حد ذاته ممكن يأثر علي عملية العلاج أو يضرها!

٧- الكتاب اللي ظهر كتير في المسلسل ، هو كتاب اسمه ( it didn't start with you ) و المؤلف اسمه #Mark_Wolynn و هو من الكتب الكويسه جدا في شرح أساس العلم ده.

٨- الطريقه دي انا بأستخدمها كتير جدا في الشغل بتاعي ...و ساعات بأستخدم طرق تانيه ...علي حسب الشخص اللي جاي.

٩- اخر حاجه احب اقولها، اني درست طرق علاجيه كتير ، و استخدمت تقنيات كتير... و في رأيي أن ال #family_constellation هي واحده من اعمق الطرق و أكثرها نجاحا في التعامل مع حالات كتيره ...

فيه جزء من لقاء تليفزيوني ليا بحاول فيه اشرح مثال للطريقه دي ...

حتلاقوه علي قناة اليوتيوب بتاعتي ... الفيديو اسمه (يعني ايه family constellation ) ، ده غير الڨيديو الاخير اللي عملته من حوالي اسبوع علي نفس الموضوع و اسم القناة

"Monir El Shazly "

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual