Before befriending your children !

Monir El-Shazly
Nov 10, 2024
3 min read

قبل ماتصاحبوا اولادكم!

(الاساس انك تفضل أم او أب الاول)

----

فيه مثل منتشر بيقول "إن كِبِر ابنك خاويه"... بمعني أن لو ابنك كِبِر، اتعامل معاه كأنه اخوك ...مش ابنك ...

و فيه مفهوم عند كتير من الأمهات (و الابهات ساعات) ان الواحد لازم يصاحب أولاده.

و بلاقي كتير ناس بتجيلي و تقوللي

"اصل انا و بنتي أصحاب!" ... و بيتكلموا بفخر عن كده، كأن دي حاجه كويسه ...

الكلام عن أن أننا المفروض نصاحب اولادنا رغم انتشاره الغريب، إلا أن ليه مشاكل كتير جدا في الحقيقه ... دول شويه منهم:

١- الشعور بعدم الأمان عند الابن أو الابنة:

الابن أو الابنة محتاج يحِس ان فيه حد اكبر منه، و واخد باله منه... و ان فيه حد ممكن يلجأله لو فيه مشكله و هو مش عارف يتعامل معاها ... الشعور ده بيقِل كتير جدا، لما الام او الأب يبتدوا يحطوا نفسهم في نفس مستواهم... علشان يبقوا أصحاب!

٢- الاولاد بتبطّل تسمع الكلام!

تخيل انك بتقول لصاحبك نصيحه، نصيحتك دي غير مُلزِمه ليه و هو مش مُطالَب أنه ينفذها ... ده بالظبط اللي بيحصل لو "صاحِبنا" اولادنا و هم صغيرين ... ساعتها بيتعاملوا مع كلامنا كأنه كلام واحد من اصحابهم، و مابياخدوهوش بجديه!.

٣- البنات لما بتحس ان ابوهم صاحبهم ، تبتدي تدوَر علي راجل بعد كده، علشان يلعب دور الأب (اللي فِضي بعد ما الاب نزل من مكانه)

الكلام ده ينطبق بردو علي الاولاد مع الام!

٤- المشاكل اللي بين الام و الاب!

المشاكل اللي بين الام و الاب (كزوج و زوجه) مش دور الاولاد أنهم يعرفوها و لا يحلّوها ... إنما لما بنلعب ادوار الصداقه مع اولادنا، بيبقوا عُرضه اكتر أنهم يتزقوا في المشاكل دى ، و ده بيعملهم مشاكل كتير بعد كده في علاقتهم بالابوين ...و علاقاتهم بعد كده ...

٥- احترام الاولاد لأبوهم و امهم!

ناس كتيره بتشتكي ان اولادها مش بيحترموهم كفايه، و بيلوموا الدنيا و انحطاط الاخلاق و ساعات Netflix علي قلة الاحترام بتاعت الاولاد ...

و رغم أن التليفزيون و الافلام و ال Netflix ممكن يكون ليهم عامل، إلا أن العامل الأكبر هو اني "نِزِلت من مكاني كأم أو أب... و بقيت في نفس مستوي اولادي (علشان أصاحبهم) ... ساعتها الاولاد بيبتدوا يتعاملوا معايا ك صاحب .... و احترامهم ليا بيقِل!

طبعا دي مجرد عَيّنه من المشاكل ..إنما فيه مشاكل تانيه اكتر من كده بكتير ...

طيب ايه اللي المفروض يحصل ؟

لازم نعرف أن الام و الاب ليهم مكانه و مستوي اعلي من الأولاد..لأنهم الأكبر ...و الأكبر دائما دوره أنه ياخد باله من الصغير ...

...هما دائما فوق (زي الشمسيه اللي بتحمي الاولاد و هما بيكبروا) و الاولاد دائما تحتها ...

ده مش معناه أنهم مابيغلطوش و لا معناه أنهم يقهروا اولادهم او يبقوا متسلطين ...أنما معناه أنهم سبب في وجود الاولاد، و أنهم ليهم الفضل في الاهتمام بيهم و بحياتهم لغاية ما يكبروا ...

و ببساطه، دور الابن أو البنت هو انهم يكونوا أولاد أو بنات لأبوهم و امهم ... مش انهم يكونوا اصحابهم... الاولاد ممكن يكون ليهم أصحاب كتير، إنما مش حيكون ليهم غير ام واحده، و اب واحد مناسبين ليهم ...

ممكن يكون علاقتنا بيهم فيها قُرب، و مبنيّه علي الحوار علشان افهمهم و اعرف اللي بيدور في دماغهم، إنما هم مش دورهم أنهم يكونوا اصحابي ...

ممكن لما يوصلوا سن المراهقه، ساعتها الحوار بيننا يزيد اكتر و نعمل نشاطات مشابهه لبعض... إنما بردو لازم يفضلوا "الاولاد" و انا الام أو الأب...

و كمان الاولاد مش لازم يعرفوا اي تفاصيل عن العلاقه بين الام و الاب كزوحين ...مش بس الجانب الجنسي، و لكن مشاكلنا كأزواج و حواراتنا... مش دور الاولاد أنهم يعرفوها أو يدخلوا فيها!

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: @monir.elshazly.spiritual