7 things to help you work on your ego !

Monir El-Shazly
May 29, 2023
2 min read

٧ حاجات علشان نقلل من الايجو (الهويه المزيفه للنفس)

#الايجو بيخلينا دائما حاسين أن علينا هجوم ... و دائما بيحسسنا اننا محتاجين *نعمل حاجه او نثبت حاجه لحد* ... و ده شعور متعب جدا علي المدي الطويل ...

مش كده و بس ...الايجو كمان كل ما بيكبر، كل ما حتلاقي نفسك بتزعل اكتر ...و اوقات السعاده عندك أقل ...

طيب نعمل ايه علشان نتخلص منه؟ ... دي ٧ حاجات ممكن تساعد!

١- نبطّل ننتقد كل حاجه ....

شعورنا بأن الحياه لازم تبقي ماشيه زي ما احنا عايزين علي طول بيخلينا دائما متوترين و غضبانين، و مع الوقت بنكره الحياه ، و نعادي الناس التانيه و نحاول نرد الاساءة بالاساءة...

إنما تركيزنا في الحاجات الكويسه في حياتنا حيخلي السلام اللي عندنا يزيد !

٢- نتخلص من الرغبة بالفوز علي طول.....

فكرة أننا نبقي فائزين طول الوقت هي فكره مش واقعيه، و بتخلينا متوترين علي طول...

احنا مش محتاجين نبقي كسبانين طول الوقت... احنا محتاجين نعرف نستمتع بالحياه اللي احنا عايشينها ... مش نستمتع بالفوز بس ...

٣- نتخلص من حاجتنا أننا نكون "الاحسن" .....

زي ما احنا احسن من ناس في حاجات، زي ما فيه ناس احسن مننا في حاجات تانيه ...

الايجو هو اللي دايما بيقارن بيننا و بين الناس التانيه ...

٤- نتخلي عن اننا نثبت أننا صح علي طول ...

حاول ماتدخلش في جدال مع حد، و لو دخلت، اقف و اسال نفسك " هل انا عايز اكون صح، و لا عايز اكون مستريح (و عندي سلام نفسي)؟" ...

اتخلي عن أي جدال، مش علشان انت احسن و مكبّر دماغك، إنما علشان انت مش محتاج تحس انك احسن ...و لا محتاج تقارن بينك و بين اي حد تاني ..

انتصارنا علي اي شخص في اي جدال بيقوي الايجو بتاعنا ..

٥- اتخلي عن الشعور بانك تكون دائما "عايز اكتر"! ...

مفيش حاجه اسمها أننا حناخد كل حاجه عايزينها!

الاستمتاع باللي عندنا و الشعور بالحمد لربنا عليه، حيخلينا مبسوطين...و ربنا حيدينا اكتر ...بس بردو مش كل حاجه احنا عايزينها ...طول الوقت

٦- اتخلي عن تقييم (و تقديم) نفسك بناءا على إنجازاتك و نجاحاتك ....

انت اعمق بكتير من مجرد شغلانه او عربيه او فلوس في البنك أو حتي اسم عيله ...أو ديانه انت مؤمن بيها....

٧- اتخلي عن رغبتك في إن الناس تكون راضيه عنك ...

لما بنقابل ناس في اي مكان، حنسيب انطباع مختلف عند كل واحد فيهم، علي حسب احنا بنلمّس عندهم في شخصيتهم ازاي ...

فيه ناس حتحبك، و فيه ناس مش حتفرق معاها ...و فيه ناس حتكرهك (ممكن لأسباب عندها هي ملهاش اي علاقه بيك!)

انت مش سمعتك... و الناس اللي بتحبك انهارده علشان كلامك عاجبهم، و تصرفاتك ماشيه علي هواهم، ممكن بكره يزعلوا منك لو كلامك مابقوش مقتنعين بيه أو خلاهم يفكروا في حاجات هم خايفين منها ...

لو حاولت ترضي كل الناس، حتنسي نفسك...

مستوحاه من مقاله ل #وين_داير مع تغيير كبير

#منير_الشاذلي

#السلام_النفسي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual