ناس كتيره شايفه انها محسوده !
- Monir El-Shazly
- Apr 28, 2024
- 2 min read
ناس كتيره شايفه نفسها محسوده !
و ان كل المشاكل اللي في حياتها دي علشان فيه ناس تانيه حاطاها في دماغها و بتنام و تقوم تفكر فيها و في اللي عندها .. و هارياها اعمال سفليه مدفونه جوه بطن الحوت اللي في القطب الشمالي!
الظريف بقي انك لما تشوف الناس دي، حتلاقيها بصفه عامه غالبا ناس مش ناجحه قوي، و كسلانه تطوّر من نفسها و حاجات كتير في حياتها بايظه منها، و علاقاتها بناس كتير من اللي حواليها وحشه و فيها مشاكل!.
الناس الناجحه مابتبصش لمين بصّلها ازاي، و مين حسدها و مين حاططها في دماغه...
و لما بتلاقي نمل عندها في البيت مابتقولش "علشان حد حاسدني "...إنما بتروح تنظف البيت علشان النمل مايجيش ...
و لما بتلاقي فار مابتقولش "علشان حد حاططني في دماغه"... إنما بتعرف أنها محتاجه تشيل اي اكل بره و تسد الفتحات اللي الفار ممكن يدخل منها ...
و لما بتحصلهم مشكله في الحياه مابيبصوش لمين مضطهدهم ، و مين حسدهم، بيبصوا لأيه اللي هم محتاجين يعملوه علشان يطلعوا من المشكله دي، و ايه اللي محتاجين يتعلموه منها!
اه #الحسد مذكور في القرآن، و اه فيه جن و شياطين... انما ربنا خلقك علشان تحاول تطور من نفسك و تشتغل عليها .
لو عايز تولع بخور... ولَع
و لو عايز تحط قرآن في البيت و تكتب "من شر حاسد اذا حسد" ...حُط...
انما قبل كل ده، نقي قلبك من الكراهيه و الشعور بالظلم و الاضطهاد ..
و اشتغل علي نفسك و طور حياتك و علاقاتك بالناس اللي حواليك . .
لأن طول ما انت شايف نفسك محسود (و #ضحية عيون الناس و قَرّهم عليك) مافيش حاجه في حياتك حتتغير للأحسن!
"أن الله لا يغير ما بقوم حتي يغيروا ما بأنفسهم"
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments