حتعمل ايه لو قابلت "نفسك و انت صغير"؟

Monir El-Shazly
May 9, 2023
1 min read

فيه مشهد جميل جدا من مسلسل #الكبير_قوي (الجزء السادس - الحلقه ٢٩) بيظهر فيه هجرس و هو بيحاور #محمد_سلام و بيسأله ايه اكتر دور كان سبب في شهرتك و أثر فيك، و طبعا علشان الكوميديا، محمد سلام بيقول كل الادوار المهمه في حياته و مابيتكلمش خالص عن هجرس ولا بيعترف بأهميته (رغم أن هجرس هو اشهر دور لمحمد سلام ، لدرجة أن الناس كانت مش عارفه اسمه و بتندهله "هجرس" في الشارع).

المشهد ده غير أنه كوميدي جدا، إلا أنه ممكن يتشاف من مستوي نفسي عميق و مهم جدا...

كلنا لعبنا ادوار في حياتنا ... دورنا و احنا اطفال ، دورنا و احنا مراهقين، دورنا و احنا مخلصين جامعه و مقبلين علي الحياه (و ادوار تانيه كتيره لمراحل زمنيه مرينا بيها)...

يا تري لو كل واحد فينا قابل دور من أدواره اللي لعبها في حياته، حيتعامل معاه ازاي؟

هل حيتعامل معاه بحب و احترام، هل حيطبطب عليه لو كان مر بتجربة صعبه و كان محتاج دعم نفسي، ولا هل حينكره و يتعامل كأنه مش شايفه، او حيقعد يلوم فيه و يشتمه؟

لو الاجابه اي حاجه غير أنه حيحبه، و يحترمه و يتعاطف معاه، يبقي الشخص محتاج يشتغل علي الموضوع ده!. لأن الدور اللي احنا لعبناه و احنا صغيرين (و خصوصا دور الطفل) حيفضل يصرخ طول العمر ... لغاية ما يلاقي حد يحبه، و يفهمه و يفَهِّمه حاجات ممكن يكون إدراكه ساعتها مافهمهاش ...

احترموا ادواركم اللي لعبتوها زمان و تعاطفوا معاها و مع وعيكم ساعتها ...و طبطبوا علي الطفل اللي بيصرخ ... و حاسس أنه محتاج يتشاف ...او يتحب!

YouTube: Monir El Shazly

Facebook page: @monirelshazlyspiritual