الوجبات السريعه الروحانيه !

الوجبات السريعه الروحاني !

The "spiritual" fastfood !

----

واحده من المظاهر الخطيره في العالم دلوقتي في رأيي، هي ثقافة "التيك اواي" ...او "الوجبات السريعه" ...

الناس كلها عايزه تعمل كل حاجه بسرعه ...

توصل للي هي عايزاه بسرعه ، تبقي غنيه بسرعه ...تتعالج بسرعه ... حتي تتطور روحانيا بسرعه ...

ناس كتيره بتسألني أسأله من نوعية "انا محتاج كام جلسه علشان اتعالج من مشاكلي النفسيه؟" ، او " انا محتاج كام شهر علشان ابقي انسان متطور روحانيا ؟"

او "هو انا المفروض اقرأ سورة الكهف كام مره علشان الحزن يمشي من عندي!"....

و ناس كتيره هاريه نفسها كورسات تنميه بشريه أو كوتشينح (coaching) أو هيلينج (healing) ...واحد ورا التاني، و كأن فيه سباق و "انا محتاج اوصل الأول!"

و مع احترامي الكبير لرغبات كل شخص و أن كل واحد *عايز يبقي سعيد بسرعه* الا ان الدنيا مش كده...كل حاجه محتاجه تاخد وقتها...

زي ما الست الحامل لو خلِفِت قبل وقتها ، الطفل حينزل ميت، و زي ما الفاكهه لو اتقطفت بسرعه حتطلع ماسخه و ما تتاكلش! ...

طبعا الايجو بتاعنا بيلعب ألعاب كتير و بيصورلنا أننا *محتاجين نوصل هناك دلوقتي* .... بس الحقيقه ان في رحلة التطور بتاعنا سواء كان نفسي او روحاني، اي طريق بنحاول نختصره، مابيوصلناش ... و ساعات كتير بيتوهنا زياده!

الفكره مش اني لو اخدت كورسات عمّال علي بطّال ورا بعضها حأعرف اتطَور اسرع ....

ولا اني لو روحت لأتنين معالجين في نفس الوقت حخِف في نص الوقت...

ولا اني لو قريت سورة معينه عشرين مره بدل عشره الموضوع حيتحل اسرع!

للاسف الفكره دي بيتم ترويجها ساعات من خلال الخطابات الدينيه أو من خلال بعض الكتب أو كورسات التنميه البشريه ... و الناس ابتدت تاخدها اسلوب حياه علشان *مش قادره تستني* !

إنما الحقيقه ان كل حاجه ليها وقتها، لا حتيجي قبلها...ولا حتيجي بعدها ...

و لو انا اكلت ١٠ اطباق مره واحده من غير ما ادي فرصه لمعدتي تهضم كل واحد (حتي لو كان طعمهم حلو)، غالبا حروح المستشفي!.

طريق التطور الروحاني و العلاج النفسي طريق مش سهل ...بس ممكن تستمتع بيه لو انت ماشي بالراحه... و الاهم...انك تكون مستعد انك تتألم شويه ..علشان تنظيف اي جرح في الدنيا بيبقي فيه الم في الأول، و كمان لأن الألم هو واحد من أكبر المعلمين الروحانيين لينا في الحياه!

إنما الوصول السريع ...اللي من غير الم، ده فكره خياليه...عمرها مابتتحقق...و غالبا الطريق اللي بنمشيه علشان مانتألمش... او بنحاول نختصر نُصّه، بيبقي اكتر طريق مؤلم علي المدي البعيد....

الاختيار ليك!

#منير_الشاذلي

(إعادة نشر)

YouTube: Monir El Shazly

Facebook page: Monir El Shazly - Family Constellation

Instagram: monir.h.elshazly.spiritual