النجاح و السعاده ...في مصر !
- Monir El-Shazly
- Feb 25, 2023
- 2 min read
بمناسبة الحوار الاخير للانسان الجميل الدكتور #مجدي_يعقوب... و شعوره بالامتنان لبلده مصر اللي اتربي فيها...و تقديره لمصر اللي دايما بيذكره في حواراته ...
بأسمع كتير قوي كمية قلش و تريقه علي استحالة النجاح في مصر، و علي الناس اللي نجحت بره مصر دول لو كانوا في مصر كانوا عملوا ايه و بقوا فين...
#النجاح في رأيي مش بس انك تكون مشهور و تاخد جوائز ... او أن يبقي معاك فلوس كتير ... النجاح في الاساس انك تكون سعيد في حياتك و حاسس ان حياتك ليها فائده... ليك و للناس اللي حواليك، و دي حاجه مالهاش دعوه بأنت عايش فين، او عندك فلوس قد ايه... او الناس بتقول عليك ايه! ...
ناس كتير قوي طلعت بره و فشلت ...و ناس كتير قعدت هنا و في بلاد أفقر و ظروف أسوأ بكتير و نجحت ...
بس اللي اكيد أن الناس اللي نجحت (هنا أو بره) ماحدش فيهم خد من الظروف اللي حواليه حِجه علشان يبرر تعاسته او فشله...
ماحدش بينجح، و هو كل يوم بينعي حظه علي البلد اللي هو فيها، او المدير بتاعه عامل ازاي (حتي لو بلده كانت فيها مشاكل او مديره كان مترقي بالواسطة) ...
ايام شغلي في مجال الاستشارات خليتني اعمل مشاريع في دول كتير في العالم (١٢ دوله بالتحديد ) ..ده غير اني عشت في ٣ دول قبل كده (غير مصر )... و اقدر اقول ان كل الدول عندها مشاكلها في العمل بشكل أو بآخر ... لو مش واسطه حيبقي عنصريه و لو مش عنصريه حيبقي شكل حياه اجتماعي صعب، أو quality of social life مش موجوده ...
ماحدش بيبقي سعيد في حياته لو كل شويه كتب بوستات علي ال facebook علي قد ايه هو مظلوم في البلد دي ، أو قد ايه هو كفاءه عاليه بس الناس هي اللي مضطهداه ... أو حتي قد ايه هو يستاهل احسن من اللي هو فيه ...او حط بوستات "سيستجيب" كل اسبوع! ...
حتي لو الظروف كانت صعبه، النجاح مش مرتبط بمكان أو زمان ... و #السعاده مرتبط بالنظره بتاعتنا للحياه!
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments