الجنس جزء مهم في الحياه

واحده من الحاجات اللي بشوفها كتير في شغلي، الكم المخيف من "الخوف و الرعب" اللي بيتزرع في الستات عن جسمهم و شكله (خصوصا من الناحيه الجنسيه) ...و خصوصا عند الناس اللي ليها خلفيه دينيه متحفظه أو متشدده، او عند الطبقات المجتمعيه المتوسطه او تحت المتوسطه ...

و من الناحية التانيه الكم الكبير بردو من "الهموم" اللي عند الرجاله عن قدرتهم الجنسيه بالمقارنة باصحابهم و بالحاجات اللي بيشوفوها و بيقروها (و ده علي مختلف الطبقات و الخلفيات للاسف)

و بيصاحب ده كم مرعب من المعلومات المغلوطة عن الجنس و العمليه الجنسيه ... و "رأي الدين" في العلاقه بين الزوح و الزوجه و دور كل واحد فيها !

للاسف الكلام ده كله بيعمل مشاكل جنسيه رهيبه في العلاقه بين الراجل و الست، و المشاكل ليها تأثير مباشر علي الزواج و قدرته علي الاستمرار و سعادة الأطراف فيه ...

مش بس كده، انما كتير من المشاكل "الجنسيه" بين الازواج و الزوجات، الاولاد بيتزقوا فيها (بشكل واعي او غير واعي) و بتعملهم مشاكل مش بس نفسيه... و لكن عضويه و سلوكيه كمان ...

و بدون الدخول في تفاصيل كتيره، ممكن اقول ان البيوت اللي مافيش فيها علاقه جنسيه بين الزوج و الزوجه (بشكل مستمر و ممتع للطرفين) غالبا بيبقي فيها مشاكل لكل أطراف البيت ... بدايه من مظاهر الغضب (سواء كان بيتم التعبير عنه او كبته)، للاكتئاب، لمشاكل تانيه اكبر و أشد خطوره ( من ضمنها أن الاولاد و البنات في البيوت دي بيبقوا اكتر عرضه للتحرش من الأطفال التانيه) ... و الاطفال بياخدوا كتير من الأعراض دي (و خاصة الغضب) و بتبقي جزء من السلوكيات بتاعتهم في البيت و المدرسه ...

الحل في رأيي (و هو الحل اللي غالبا مش حيعجب ناس كتير ) هو أن الثقافه الجنسيه لازم تزيد ..و يتم تدريسها في المدارس ...

بس قبل المدارس لازم المعرفه_الجنسيه تزيد عند الآباء و الأمهات ... لازم الناس تقرا عن الجنس بشكل علمي و طبي، و تسمح لأولادها تقرا عنه و تتناقش معاهم فيه (بدل ما ياخدوا أفكارهم من أصحابهم او من افلام اباحيه ...او من رجال دين ماعندهومش النوع ده من الثقافه اصلا أو عندهم افكار مغلوطه او ذكورية النزعه) ...

الجنس جزء أساسي في الحياه، و مُكَون أساسي لأي علاقه بين راجل و ست، و سبب مهم لإستمرار و نجاح اي علاقه زوجيه...

و طول ما احنا بنبصله علي أنه عار و taboo و خايفين منه علي اولادنا طول ما احنا بنربي فيهم الخوف منه و بنسيبهم فريسه لأي كلام فارغ و افكار بايظه ممكن تتقالّهم و ياخدوها مُسَلَم بيها ...

الإنسان لو عايش في بيت، حيلاقي نفسه غالبا بيهتم بيه و يحاول يخلي شكله حلو و ياخد باله منه ...

كمان الجسد اللي الناس كتير باصه ليه بدونيه و احتقار هو البيت اللي روحنا ساكنه فيه في الحياه، و لازم نبطل نبصله بخوف ...او احتقار أو كره ...

احترامك لجسمك و معرفتك بيه و استمتاعك بيه (من غير ما تعمل لنفسك هَويه منه) ، هو جزء من شكرك لربنا علي نعمته ... و جزء من اهتمامك بروحك اللي عايشه جواه دلوقتي ...

#الجنس_جزء_مهم_في_الحياه

و #الجسم_مش_عار

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual