#اضطراب_الشخصيه_النرجسيه (3) - ازاي تسيب #شخص_نرجسي

#اضطراب_الشخصيه_النرجسيه (3) -

ازاي تسيب #شخص_نرجسي (عنده "اضطراب الشخصيه النرجسيه")

في البدايه، احب تاني اوضح ان مش اي شخص انا عندي مشاكل معاه في اي علاقه يبقي "شخص نرجسي" و مريض، لأن الكلمه دي بقت منتشره جدا الايام دي. قبل ما نوصف شخص أنه مريض و عنده "اضطراب الشخصيه النرجسيه" لازم يكون عنده صفات نرجسيه كتيره انا اتكلمت عنها قبل كده في الڨيديو بتاعي اللي اسمه "صفات نرجسيه" و كتبت عنها قبل كده اكتر من مره!.

احب كمان اوضح ان فكرة انك تسيب علاقه مع شخص عنده "اضطراب الشخصيه النرجسيه " ممكن يكون حاجه صعبه جدا، و ده لأن الأشخاص اللي عندهم النوع ده من الاضطراب ممكن يستنزفوك عاطفياً ومالياً ونفسياً. هم في معظم الأحيان عندهم غضب كبير (تجاه حد من اهلهم) و بيطلعوا الغضب ده عن طريق الدخول في علاقه مع شخص يعاملوه بشكل وحش، و يتلاعبوا بعواطفه علشان ينتقموا من اهلهم و يثبتوا لنفسهم (و لأهلهم في عقلهم الباطن) أنهم اقوي و انصح و اذكي من اي حد تاني!

احتمال كبير انك تكون تعبان و حاسس انك مش قادر تسيب العلاقه دي و تمشي، و احتمال تكون حاولت قبل كده اكتر من مره و مانجحتش انك تكمل و تخرج فعلا ... بس الكلام ده ممكن يساعدك جدا انك تمشي و تسيب العلاقه دي و الشخص ده إلى الأبد.

الكلام ممكن بيان انه شويه زياده، بس فيه نماذج نرجسيه ممكن فعلا توصل للدرجه دي!

1. ماتديلوش "فرصة تانيه".

الناس دي لو سبتها حيحاولوا يرجعوك بكل الطرق (علشان هم اللي بيحبوا يمشوا مش أن حد يسيبهم و يمشي) لأن كل حاجه لازم تحصل علي حسب مزاجهم، و لازم هم اللي يسيبوك لما يزهقوا او يحسوا انك مش مقدر "النعمه اللي انت فيها".

لو الشخص اللي عنده الاضطراب ده مش جاهز أنه يسيبك دلوقتي فغالبا حيحاول يرجعك و يقولك اد ايه هو آسف و أن " المره دي غير كل مره" ... ماتصدقش الكلام ده لأن بغض النظر عن عدد الفرص اللي ممكن تديهالهم، النتيجه دائمه حتكون هيّ هيّ!

2. ماتصدقش انهم حيرجعوا تاني زي ما كانوا في البدايه!

البدايه دي هي الطريقه اللي بيسحروك بيها في الأول... انما شخصيتهم الحقيقيه مش كده. ماتفتكرش ان دي شخصيتهم في البدايه دي هي الحقيقيه و انهم اتغيروا!. الحقيقه ان شخصيتهم الحقيقيه هي اللي بانت ليك دلوقتي... مش اللي انت شوفتها في الأول!

3. ماتقولهمش أن انت "بتفكر تمشي " (الا لما تكون اخدت القرار و بتبلغهم انك ماشي فعلا!)

الشخص المصاب بالاضطراب ده لو قولتله (قولتلها) انك ناوي تمشي يا إما حيرجع تاني جميل و عاطفي و حنين (زي بداية العلاقه ) علشان يرجعك تاني تحت سيطرته او أنه حيبقي اكتر شراسه معاك (ومن المحتمل أنه يأذيك جسديا لو كان بيجيله نوبات غضب أو يحاول يسوأ سمعتك علشان تخاف تمشي!)

4. ماتصدقش الدلع بتاعهم و تَدّليعهم ليك!

الناس اللي عندهم الاضطراب ده حيحاولوا يدلعوك ساعات و يسيئوا ليك و يكسروك في ساعات تانيه علشان ماتمشيش، و تفضل تحت رحمتهم والهدف النهائي انك تحس انك يا إما مش قادر تمشي من العلاقه علشان امتصوا طاقتك كلها او انك حتموت من غيرهم (و مش حتلاقي حد يحبك! )

5. اتجاهل العياط و التوسلات (و الابتزاز العاطفي)

الأشخاص دول أذكياء جدا في معرفة نقط ضعفك و حيلعبولك عليها، و حيحاولوا يتأثروا عليك عاطفيا و يقولك أنهم "عمرهم ماحيلاقوا حد زيك" و أنهم "حيموتوا من غيرك". حيحاولوا يتأسفوا و احتمال يعيطوا و ينزلوا علي ركبهم علشان يترجوك و حيحاولوا يفكروك بكل الذكريات الحلوه اللي بينكم!

شويه حيقولك انه هو المنقذ "و أنه انقذك من الناس اللي كانوا بيستغلوك"، و شويه حيبتزك عاطفيا و يقولك "أنك عديم القيمة ، وماحدش عمره ما حيرضي بيك" ، وشويه حيبقي ضحيه و يقولك "انا حموت من غيرك".

كلها العاب علشان ترجع تحت سيطرته!

6. اعمل نسخة من جميع مستنداتك!

الناس اللي بيعانوا من الاضطراب ده من المعروف جدًا أنهم بيحاولوا يحتفظوا بكل حاجه في ايدهم!. لو عندك قسيمة جواز، جواز سفر أو اي اوراق حكوميه او اوراق ملكيه خليهم معاك ... و لو فيه اي حاجه معاهم ليك (صور، فيديوهات او اي حاجه ممكن تضرّك او يمسكوها عليك )... اتأكد انها مش في ايدهم او امسحها!

7. اتأكد انك معاك فلوس كفايه!

الضغط المالي هو احد الوسائل اللي ممكن يستخدموها. إذا كنت بتفكر تمشي من العلاقه اعمل حساب خاص في البنك، مش حساب مشترك معاهم (و طبعا ماتقولهمش انك عملت كده!)

و لو مامعكش (ما معكيش) فلوس كفايه دوَّري علي شغل و استعيني بأهلك او اصدقاءك علشان يساعدوكي ماديا في الأول لغاية ما تقفي علي رجلك. الخروج من العلاقه ببقي اسهل بكتير لو معاكي فلوس او لو انت مستقله ماديا!

8. بلّغ عن اي اعتداء يحصلك (عرّف الناس اللي بيحصل و الاساءات اللي بتتكرر)

حتي لو حاسس انك مش عايز تبلغ البوليس لو فيه ضرب أو اعتداء جسدي،

لازم تبلغ أهلك (ابوك /امك /اخواتك او قرايبك) علشان يعرفوا أن فيه النوع ده من السلوكيات في العلاقه، لأن غالبا الشخص ده حيبقي بيحاول يبان جميل و لطيف قدامهم و يخلي منظرك انت اللي وحش قدامهم علي طول).. و ممكن كمان تبلغ الدكتور النفسي بتاعك (او بتاعه).

الجو بتاع "خلّي مشاكلنا في بيتنا مهما كبرت" الناس دي ممكن يستغلوه اسوأ استغلال!

9. اخرج من اي حساب مشترك علي وسائل التواصل الاجتماعي (و غيّر اي باسوورد همّ عارفينه!)

غيّر الباسوورد بتاعك و اخرج من اي حساب ليك علي الموبايل بتاعهم.

مفيش حاجه اسمها انه يشوف حاجتك، و مفيش داعي انه يكون عارف الباسوورد بتاع الايميل و الكريديت كارد بتاعك!

الجو بتاع "اللي عندي عندك" و "احنا مش لازم نخبّي حاجه علي بعض" حيساعدهم أنهم يفضلوا مسيطرين عليك

10. افحص موبايلك (و اللابتوب بتاعك) علشان ممكن تلاقي برامج تتبّع او تجسس!

في برامج ممكن تكون مش بس بتعرّفه (بتعرّفها) انت فين او بتعمل ايه، انما كمان ممكن تسجل محادثاتك و الchats بتاعتك!

11. ارجع تاني و قرب من عيلتك و اصحابك!

انت محتاج تعمل نظام مساعده(support system) ليك علشان تمشي ..

الناس اللي عندهم الاضطراب النفسي ده غالبا بيعزلوا ضحاياهم عن اصحابهم و اهلهم و كل معارفهم (علشان و الضحيه وحيده حتبقي اسهل في السيطره عليها!)

ممكن يكون الشخص اللي عنده الاضطراب ده ابتدي يقولك قد ايه أهلك بيكرهوك و بيفضلوا اخواتك عليك، و ان اصحابك بيغيروا منك ( او في بعض الأحيان بيعملولك اعمال سحر علشان بيحسدوك)

حتي لو كنت بعدت عن اصحابك و اهلك، حاول ترجع و تعتذر ليهم ،و حتندهش من عدد الأشخاص اللي نفسهم يساعدوك بس ماكانوش عارفين يوصلولك!

12. مش كفايه انك تمشي من العلاقه - ابعد عنهم همّ شخصيا!

الجو بتاع "خلينا نبقي اصحاب" ده مش حينفع معاهم! طول ما فيه باب ممكن يدخلولك منه، تأكد انهم حيعملوا كده! حتي لو فيه اولاد، خلي العلاقه اللي بينكم اساسها الاولاد و مبنيه علي الاحترام المتبادل... مش اي حاجه تانيه!

13. اتخلي عن الحاجات اللي مالهاش لازمه!

اتخلي عن كل حاجه مالهاش لازمه في حياتك (و بتربطك بذكريات مع الاشخاص اللي عندهم الاضطراب ده)... اي حاجه مش بتستفيد بيها (او عندك حاجه بديله ليها بتأدي نفس الغرض)، اديها لحد تاني ... علشان تقفل الصفحه!

14. اشتغل علي نفسك!

في سبب خلاك/خلاكي تجذبي النوعيه دي من الاشخاص في حياتك، محتاج تعرف السبب علشان ده مايحصلش تاني. لأنك لو ماتعلمتش الدرس، حيرجع الناس دي تاني في حياتك، حتي لو مش الشخص نفسه، بس نفس نوعية الاشخاص دي

15. اكتب اللي حصل!

مع كمية العياط و الرجاء و الوعود اللي الشخص ده حيعملها علشان ترجعله (ترجعلها)، ممكن تحس انه صعبان عليك و عايز ترجع، و واحده من الطرق اللي ممكن تخليك جامد و ثابت علي موقفك، انك تكتب كل اللي حصل في العلاقه، و كمية الاساءات اللي الشخص ده عملها و اللي خليتك عايز تمشي! و لما الشخص ده يكلمك (او يبعتلك) او حتي يطلب يقابلك، اقرا اللسته اللي انت كتبتها (قبل ما تتواصل معاه) علشان تفتكر كمية الأذي النفسي اللي حصلك و ماتضعفش!

(ماتنساش ترمي اللسته دي بعد ما العلاقه تخلص و تتعلم الدرس، لأنك لو فضلت محتفظ بيها حتفضل متعلق في العلاقه حتي لو كانت خلصت!)

16. اعرف ان تعاطفك مع الشخص اللي بيستغلك، و رجوعك ليه مره تانيه، معناه انك مش متعاطف مع نفسك، و مابتقدرهاش كفايه!. لو صعبان عليك، ادعيله... بس من بعيد لبعيد!

17. “الشخص اللي عنده الاضطراب ده شخص مريض و محتاج علاج! “

ده كلام صحيح جدا، بس مش دورك انك تعالجه، و لا حتعرف تعمل كده لو انت في علاقه من النوع ده معاه. ساعات بيبقي احسن مساعده نقدمها لحد عنده مشكله، أننا نسيبه يتألم كفايه علشان يطلب العلاج و يحاول يشتغل علي نفسه (بعيد عنك!)

18. ماتدخلش في علاقه تانيه بسرعه!

ناس كتيره بيطلعوا من علاقه سيئه و يخشوا في علاقه تانيه أسوأ... لما تطلع من علاقه، خد وقتك لغاية ما تبقي كويس (من غير ماتدخل في علاقه تانيه علشان انت فاكر ان ده حيخليك كويس)... كمان لازم تتعلم الدرس من العلاقه دي، علشان ماتدخلش في علاقه تانيه شبهها!

لما تقف علي رجليك و تبقي كويس، ساعتها حيبقي عندك فكره احسن عن نوعية العلاقات اللي انت محتاجها في حياتك، و نوعية الناس اللي محتاج تبعد عنها، و بعد كده حتبقي جاهز لأنك تدخل في علاقه اخري!

بعد ما تسيب شخص عنده الاضطراب ده، رأيي انك محتاج مش اقل من سنه تشتغل فيها علي نفسك، علشان تبقي جاهز انك تدخل في علاقه تانيه، مش شهر او حتي 6 شهور

19. أستعين بمعالج نفسي (therapist or coach) علشان يساعدك تفهم ليه الأشخاص دي ظهرت في حياتك و ايه اللي خلاك تقع تحت سيطرتهم، لأن غالبا الاسباب دي مش حتقدر تشوفها لوحدك بسهوله، و جو الصعبانيات و "اصل الناس كلها بقت وحشين" و "اصل انا طيب و empath و علشان كده الأشخاص دي ظهرت في حياتي" مش هو الدرس اللي انت محتاج تتعلمه!

الموضوع أعمق من كده بكتير!

*Please feel free to share

#منير_الشاذلي

#Monir_El_Shazly

YouTube: Monir El Shazly

Facebook page: Monir El Shazly - Family Constellation

Instagram: monir.h.elshazly.spiritual