اصل انا بحبه /اصل انا بحبها!

كتير بقابل في الشغل بتاعي ناس في علاقات غريبه ، و مضرّه ليهم بشكل كبير… و لما اسألهم ” طب ايه اللي مقعّدكوا؟”. دايما الاجابه : “اصل انا بحبه/بحبها ، و مش قادر استغني عنها ! “

و طبعا بتكون الكلمه دي هي نهاية الحوار بالنسبالهم.

لكن الحقيقه ان مفتاح الحل هو في جملة “ماقدرش استغني عنه/عنها “. لان الحب الحقيقي (في مفهومي) ما فيش فيه تعلّق بالشخص… فكرة ان حد مايقدرش يعيش من غير حد فيها تعلّق كبير… و علي الرغم من ان الفكره يبان شكلها رومانسيه و جميله…. الا ان في معظم الاحيان الشخص اللي بيقول كده بيبقي مش قادر يعيش (او يستغني) عن نوع معيّن من الاهتمام او الشعور اللي الشخص التاني بيديهولو… و عايز الشخص يفضل بنفس الشكل. و يدّيله نفس الاهتمام !. اما لو الشخص ده اتغير ، او ابتدي مايعملش نفس الافعال اللي كان بيعملها.. فالشخص (اللّي كنا مش قادرين نعيش من غيره ) بيتحول في نظرنا لشخص اناني و مش شايف اِلا نفسه… و… و… و… و طبعا ده معناه ان اللي احنا سميناه “حب” و اقنعنا نفسنا بيه ، هو في اكتره نوع من التعلّق بشخص علشان يديلي حاجات انا محتاجها و مش قادر اديها لنفسي ( زي الشعور بالاهميه ،او غيره).

خلاصة اللي عايز اقوله هو ان العقل الباطن لناس كتير بيستخدم كلمة “انا بحبه و ماقدرش اعيش من غيره ” حجه علشان مايشتغلش علي نفسه و يشوف ايه المشاكل بتاعته و يحلها، و يستسهل انه يعيش في دور ضحية الحب و شهيد الغرام.

لو انت في علاقه و حاسس ان العلاقه دي فيها كتير من الظلم او قلة الاحترام… ماتخلّيش كلمة ” انا بحبك” تضحك عليك…. لأن الحب الحقيقي مافيهوش لا تعلّق … و لا شروط…. و لا توقعات… و قبل كل ده فيه احترام!

#منير_الشاذلي

#Monir_El_Shazly