اسبوع العرفان بالجميل (٥) - السفر و العيشه لوحدي تجارب مهمه في حياتي -----
- Monir El-Shazly
- Dec 10, 2024
- 2 min read
اسبوع العرفان بالجميل (٥) - السفر و العيشه لوحدي
تجارب مهمه في حياتي
-----
ناس كتير ما تعرفش اني اتولدت في السعوديه. و اني قضيت فيها اول ٦ سنين من عمري، و بعدين روحت فنلندا حوالي سنه و نص قبل ما ارجع مصر.
و طبعا لما رجعت مصر كان عندي رفض كبير لكل حاجه فيها (بالمقارنة بفنلندا ، و بالمقارنة بالصوره اللي اهلي كانوا راسمينهالي عن مصر الستينات و أوائل السبعينات ، اللي كانت مختلفه تماما عن مصر الثمانينات لما جيت اعيش فيها )
و علشان كده، كنت عارف اني "مش حعيش في البلد دي" و كنت مستني اني اخلص ثانوي و اروح ادرس و اعيش بره! .
و للاسف بعد ما خلصت مدرسه، ابويا كان بيمرّ بظروف ماديه منعت اني اروح اكمل دراسه بره، بس فضل الحلم في دماغي لدرجة اني اول ما خلصت جامعه، اشتغلت و حوّشت علشان يبقي عندي فرصة الدراسه بره ...و بعديها ب ٣ سنين كنت سايب مصر علشان اعمل ماچستير في انجلترا... طبعا أنا كنت مسافر علشان ادرس، بس كان كل اللي في دماغي اني بعد ما اخلص دراسه "مش عايز ارجع مصر".
و لما روحت عشت لوحدي بره، حاجات كتير اتغيرت في نظرتي للحياه، و اكتشفت قد ايه مصر فيها حاجات حلوه، قرايب و اصدقاء ، و ناس طيبه فيهم حراره و خفة دم مالقيتهاش في اي حته في العالم ...
و علي غير المتوقع ، قررت بعد ما خلصت الدراسه اني ارجع مصر!
حاجات كتيره عن نفسي عرفتها لما سافرت و عشت لوحدي... حاجات عن شخصيتي، عن قدرتي علي الاندماج، و التعامل مع التغيير ... و عن قد ايه حاجات بناخدها مُسلّم بيها زي حب "الاب و الام", و زي الاصحاب و القرايب اللي بتحبهم، الحاجات دي بنعرف قيمتها لما بنسافر...
كمان حاجات كتيره اكتشفت انها مهمه بالنسبالي في مصر لما سافرت...
زي الدفا بتاع الناس، زي الشمس اللي بتطلع معظم أيام السنه... و زي انك تتفرج علي فيلم كوميدي شوفته 100 مره، و تضحك علي افيه ماحدش حيفهمه اللا اللي عاش في البلد دي! ... و زي انك تبقي عارف ان لو حصلتلك مشكله فيه 100 واحد صاحبك ممكن تكلمه و ييجي يساعدك! ...و لما رجعت بقيت ببُصّ لمصر بشكل مختلف تماما ...
السفر بيعلّم كتير.
و الحياه لوحدك، بتعلم اكتر، و بتخلينا نشوف قد ايه الحاجات المسلّم بيها، هي الحاجات المهمه ... الحاجات اللي بتعمل الفرق!
YouTube: Monir El Shazly
Facebook page: @monirelshazlyspiritual
Instagram: monir.elshazly
コメント