اسبوع العرفان بالجميل (٤) - وفاة امي و ابويا تجارب مهمه في حياتي

اسبوع العرفان بالجميل (٤) - وفاة امي و ابويا

تجارب مهمه في حياتي

----

الناس القريبين مني دائما عارفين قد ايه انا بأركز في شغلي علي العلاقه مع الأم و الاب ... و بأعتبرها أساس لأي علاقه سويه بنخشها.... و علاقتنا بالحياه بصفه عامه ... و ناس كتيره سألتني انا ليه دايما مركز علي الموضوع ده، و ليه انا مديله الاهميه دي كلها ... و السبب في كده، العلاقه بتاعتي مع ابويا و امي... و تعاملي مع وفاتهم!

الناس اللي لسه امهم و أبوهم عايشين احتمال مش حيفهموا الكلام ده قوي، بس في حاجه كبيره جدا فينا بتتغير لما ابونا او امنا (او الاتنين) بيموتوا.

انا علاقتي بأمي كانت دائما حلوه في المجمل و كان دائما فيه بيننا تفاهم كبير ، إنما علاقتي بأبويا كان فيها ساعات اوقات صعبه ..خصوصا و انا مراهق ... و علي الرغم من كده، وصولي لسلام نفسي في علاقتي بيه و هو عايش و كمان سلام نفسي اكتر معاه بعد وفاته (لأننا ممكن نوصل لسلام نفسي مع اهالينا بعد ما يتوفوا بردو )، كان لسه اثر مباشر علي حياتي ... و خصوصا حياتي العمليه. فيه حاجه بتتغير فينا بعد ما بنوصل لسلام نفسي مع اهالينا (و مع وفاتهم و انتقالهم من الحياه دي).

علاقتي بأبويا و امي و سلامي النفسي معاهم و مع وفاتهم... و مع اللي حصلّهم في حياتهم ...و مع اللي حصلي في حياتي و كانوا هم من أسبابه الرئيسيه، خلّي شغلي ياخد منحني تاني خالص، ماكانش ممكن ياخده الا لو وصلت للسلام النفسي ده.

بيرت هيلينجر (مؤسس تقنية #الوقوف_العائلي #familyconstellations ) كان بيقول ان مفيش معالج نفسي حيقدر يشتغل بشكل مفيد مع الناس اللي جاياله من غير ما يحترم أمه و ابوه، و يوصل لسلام نفسي معاهم ... مش بس كده، و كمان يفتح قلبه لأم و اب الشخص اللي جايله ... و من تجربتي الشخصيه...الكلام ده سليم تماما.

و علي الرغم من أني بفتقد امي و ابويا ساعات، و بيوحشوني ساعات كتير تانيه، الا اني شاكر ليهم علي كل حاجه اخدتها منهم في حياتهم ، و كل حاجه اتعلمتها بسببهم بعد وفاتهم.

التجارب المهمه (و الصعبه ) هي اللي بنتعلم منها اكتر، و في رأيي مفيش تجربه اهم من العلاقه مع الأم و الاب ... !

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: Monir.elshazly