اسبوع العرفان بالجميل (٤) - الاصدقاء
- Monir El-Shazly
- Dec 8, 2023
- 2 min read
اسبوع العرفان بالجميل (٤) - الاصدقاء
---
طول عمري كنت بحس أن الاصدقاء هم "العيله اللي بنختارهم" -
و طول عمري كان ليا أصدقاء كتير . و بحُكم اني اتنقلت بين اكتر من بلد، و بين اكتر من بيت في القاهره (و اكتر من مدرسه و نادي) ، فدايما كنت بأعمل اصدقاء في كل حته بروحها ، و بعدين لما امشي من مكان لمكان، اعمل اصدقاء جداد، و احتفظ بصداقة ناس من القديمه.
و دائما شايف نفسي محظوظ أن ليا اصدقاء في حياتي ممكن اعتمد عليهم ... ناس جميله و مش ممكن احلم باصدقاء احسن منهم 🙏.
إنم في يوم من الايام زمان، (و كان ليا ساعتها جروب كبير من الأصدقاء)، اكتشفت أن ناس منهم بيتكلموا عليا وحش من ورا ظهري، و بيقولوا عليا كلام وحش، كتير منه مش حقيقه.
الغريب أن ناس كتيره من الناس دي كانوا عاملين نفسهم اصحابي، و بييحوا يباتوا عندي،و بيحكولي أسرارهم ، و بيقولولي قد ايه صداقتي فارقه معاهم !.
طبعا الموقف ده كان صعب عليا جدا، و كان ممكن يدخلني في دور الضحيه و الصعبانيات تطلع عندي زي ما معظم الناس بتعمل 😊.
و كان ممكن بردو اني أقرر اني ابطل اثق في الناس تاني و اخش في دور "مفيش صاحب يتصاحب" و "ملعون ابو الناس العُزاز" و الجو ده!
المهم الحمد لله اخدت القرار الصح ساعتها (بمساعدة كلام امي و ابويا ) و قررت اني أواجه الناس اللي اتكلمت عليا كده، و اتعامل معاهم مش بالطريقه اللي هم كانوا يستاهلوها و انتقم (لأن أسرارهم كلها كانت عندي) ، إنما بالطريقه اللي انا اتربيت عليها... الطريقه اللي انا شايف اني بعامل فيها ربنا !
الموقف ده علمني حاجات كتير عن نفسي و عن هل انا بأتكلم كلام و اعمل عكسه لما اتزنق، ولا انا فعلا مقتنع باللي بقوله و بنفذه.
كمان لما سافرت بره و اتعرضت لموقف مشابه من صديق ليا (بسبب اعتقد انه كان عنصري ) الموقف ما اثرّش فيا قوي، علشان كنت اتدربت عليه قبل كده 😁.
إنما الدرس الاهم من كل ده، هو أن مافيش حد بيفضل علي طول!. كل الناس ليها وقت في حياتك، و لازم يمشوا بعديه. فيه ناس حتقعد اكتر من ناس تانيه، و فيه ناس حتمشي بشكل محترم، و ناس حتختار انها تمشي بشكل مش محترم قوي... ف الواحد لازم يستمتع بالناس و هم في حياته، و يعرف أن ممكن الناس تكون بتحبك، بس غيرتهم منك تخليهم يتصرفوا بشكل فيه أذيه ليك ...و علشان هم بشر ..فهم مش معصومين من الخطأ!.
و في النهايه لما ييحي وقت انهم يمشوا، افتكرلهم الحاجات الحلوه، و ماتدفّعش الناس الجديده فواتير العلاقات القديمه اللي كان فيها مشاكل!
اتعلم الدرس، و سيب فرصه للناس الجديده في حياتك ييجوا، و يعملوا ذكريات جديده معاك!
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments