اسبوع العرفان بالجميل (٣) - الاهل

اسبوع العرفان بالجميل (٣) - الاهل

و انا صغير ...كنت مش متصل قوي بأهلي ...كنت بحب ناس فيهم ...بس كنت دائما شايف أن الاصحاب هم الأساس في ي الحياه ...

و لما كبرت ..عرفت أن الاهل دول حاجه مش بتتعوض ...

ده مش معناه أن الاصحاب مش مهمين ...اننا معناه أن الاهل دول حاجه اساسيه في الحياه ...هم الsystem اللي ربنا خلقنا فيه ، النظام العائلي المناسب لينا علشان نكبر و نتطور ....

اول شخص احب اشكره هي خالتي نشوي الله يرحمها. العلاقه اللي كانت بينا كانت علاقه غريبه جدا. كان فيها حب غريب ( زي ماتكون كانت امي) و هي الشخص الوحيد في حياتي اللي عمره ما خذلني (ايام ما كان عندي توقعات من الناس). الي امي التانيه "انّا" - صاحبه الضحكه الجميله و الصحبه اللي علي طول فيها حكايات و فوازير. انتي احد اسباب اني اتعلمت اعبر عن اللي جوايا.

الكلام مش ممكن يعبر عن اللي جوايا ....

شكرا ليكي ...و حتفصل صورتك دايما في قلبي 🙏

عصام Mohamed Ali Soliman

اول صديق ليا في الحياه. رغم فرق العمر اللي بينا انما كان دايما فيه حب كبير ليك في قلبي. و رغم اننا ماكناش بنتقابل كتير علشان فرق البلاد.. انما انا شاكر ليك لذكريات طفوله جميله... و لأول مفهوم ليا عن الصداقه

احمد سلطان Ahmed Sultan Artist انت عارف قد ايه انا كنت دايما ببصلك بإعجاب كبير و انا صغير. حبك للحياه و الضحك و الحس الفني اللي عندك دايما كان بيأثر فيا. و دايما بحس ان فيه حالة حب بتربطنا مع بعض .

مني صبري Mona Sabry و تغريد إسماعيل اصدقاء الطفوله.. السهر ..لعب بنك الحظ و سماع اغاني محمد منير و حميد الشاعري. انتوا كنتوا اكتر من اخواتي و انا سعيد ان ذكريات طفولتي و شبابي كان ليكوا جزء مهم جدا فيها

اشجان سلطان Sugar Alisoliman انتي ليكي في قلبي معزه خاصه جدا ...

ايمان سلطان Eman Soliman

كنتي دائما من الناس القريبه ليا، و صحبتك دائما كانت محببه لقلبي ( و دايما فاكر الفلوس اللي اديتيهالي و انا صغير 😁) كانت احد ذكريات طفولتي الجميله اللي دايما بفتكرها

سلوي الشاذلي Salwa ELShazly اختي الجميله.. كنا في بلاد مختلفه معظم حياتي. بس الاتصال الروحي اللي بينا كان دايما غريب.

انتي ليكي مكانه كبيره في قلبي

احمد الشاذلي و سهير الشاذلي Soheir Ahmed و محمد الشاذلي اخواتي الاعزاء. حتي لو مابنتكلمش او بنتقابل كتير... بس انتوا و اولادكوا ليكوا مكانه كبيره عندي...

احمد طلعت Ahmed Raafat ذكريات كتيره من مراهقتي كانت معاك. تنس و بلياردو و ضحك كتير.. شكرا لوجودك في حياتي 😊

مني قابل Mona Kabil و حسن رزق Hassan Rizk Rageh البيت اللي دايما مفتوح... و الناس اللي ممكن تعتمد عليها بجد... وقفتكوا جنب امي في مرضها حاجه عمري ماحنساها . شكرا ليكوا 🙏

اسماعيل صبري.. اول كاميرا جاتلي في حياتي.. كنت انت اللي جايبهالي ... دائما يفتكر هدوئك في التعامل مع المواقف و نظرتك في الحياه... انسان جميل...

منير قابل... خالي العزيز ... بيقولوا اني اخدت منك حاجات كتيره غير اسمك .... بس خفة دمك مأعتقدش حد ممكن تكون عنده... انت ليك مكانه في قلبي :-😊

بابا قابل... جدي العزيز ... يمكن ماشوفتكش كتير.... بس قصصك و نوادرك لسه بأحكيها.... و ساعات امي كانت بتبصلي و تقولي اني فيا منك.... و دلوقتي الايام عدت و بقيت بأعمِل عندي جلسات و ندوات و اتكلم فيها عن الروحانيات و علم النفس ...زي ما كنت انت بتعمل جلسات و ندوات عندك في البيت و بتعزم فيها كُتّاب و مثقفين ... مبسوط اني بأكمل التراث بتاعك ...

ماما قابل.. جدتي العزيزه ...

كنت عارف انك بتحبيني و أن ليا في قلبك معزه خاصه .... احلي "دِمعه" كلتها في حياتي... كان بيتك هو بيت العيله :-)

امل سليمان Molly Soliman

ماكنتش قريبين قوي و احنا صغيرين ..بس قربنا جدا قبل ما تمشي و تروحي الناحيه التانيه من الحياه ...كنتي انسانه جميله جدا و كل ال Facebook لغاية دلوقتي بيتكلم عنك و عن الناس اللي اثرتي في حياتهم ... مبسوط اني عرفتك ..حتي لو كان لوقت قصير ...

... اخواتي الصغار... شريف منير Sherif Mounir

صديقي و اخويا الصغير اللي اكتشفته لما كبرت ...انت عارف انا بحبك قد ايه ...

و كريم منير Karim Mounir يمكن مش بنتقابل كتير زي ما احب ...بس دايما انت و انا عارفين أن الحب موجود ... و انا عارف و انت عارف ...ان كل واحد فينا موجود للتاني

و ياسمين منير Yasmin M.Mounir يمكن بردو مابنتقابلش كتير ...إنما دائما بستمتع لما بزوركم ...و العيد بالنسبالي هو "الزياره" اللي بجيلكم فيها 😁...

الحب اللي في قلبي ليكم كلكم كبير جدا ...

و لو كنت اتمني يكون ليا اخوات تانيين... كنت حأختاركوا.. زي ما انتوا :-😊

و اخيرا ...جدي الاكبر ... ابو الحسن الشاذلي ... كان دايما فيا حاجه بتحِن للصوفيه و بتحبها ... و بعدين اكتشفت انها جايه منك ...

طبعا ماقابلتكش بس طول عمري الناس بتسألني "انت صوفي" ..و بقولهم ..انا فيا "قلب صوفي" ... غالبا ده قلبك 😇🙏

لكل الناس دي...و لكل العيله بتاعتي ..كل واحد فيكم مر بحياتي ...و ساب اثر ... انتوا ليكوا مكانه في قلبي ...

شكرا

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual