اسبوع العرفان بالجميل (٢) - نتيجة الثانويه العامه
- Monir El-Shazly
- Dec 7, 2024
- 2 min read
اسبوع العرفان بالجميل - تجارب مهمه في حياتي (٢)
----
انا كنت طالب شاطر جدا و انا صغير . في الابتدائيه كنت اول الجمهوريه بمجموع ١٠٠٪ (و ده قبل ما يعملوا اضافة لدرجات تفوق رياضي او اي حاجه تانيه)، و في الاعداديه كنت من العشره الاوائل علي المنطقه، و اعتقد اني كنت بحاول اتفوق دراسيا كنوع من أنواع رد الفعل لمشكلتي في الكلام اللي اتكلمت عنها في بوست امبارح، و علشان *كنت فاكر* أني مش متشاف كويس من بابايا، و كانت دي طريقه من الطرق اللي ممكن اخليه بيها يشوفني !
و جت ثانويه عامه (اللي كانت من اسوأ سنوات حياتي علي ما اتذكر)، كنت حاسس بضغط رهيب، خصوصا اني كنت عايز ادخل كلية طب و ابقي دكتور نفسي .
و جت ثانويه عامه، و جبت فيها ٧٨٪ ، و طبعا ده بالمقارنة بال ١٠٠٪ بتاعت ابتدائي كان بالنسبالي زي مايكون اني سقطت في السنه!
طبعا مش محتاج اقول اني كنت متأكد أن فيه غلط في الدرجات، لأن المواد اللي كنت كويس فيها جدا (زي الانجليزي و الألماني و الفيزياء) كانت أقل مواد جايب فيها درجات!. المهم اخدت النتيجه و فاكر اني كنت ماشي في الشارع بعيّط و انا راجع، و بكلّم ربنا و بقولّه "انا اتظلمت، و انت عارف!".
و قعدت مده كبيره بفكر أني أعيد السنه علشان احسّن المجموع... و بعدين قررت اني مش حأعمل كده لأني مش ضامن أن نتيجة السنه لو عدتها مش حيحصل فيها غلط بردو!.
و قررت ساعتها اني اتخلي عن حلم اني ابقي دكتور نفسي ، و ادخل كلية "تجاره خارجيه" و احول حلمي من الطب النفسي للاستشارات الاداريه و التسويقية !
و تمر الايام، و اشتغل فعلا في الاستشارات، و بعدها ابتدي اشتغل في التدريب... و بعدها ابتدي اصمم كورسات ليها علاقه بالتنمية البشريه، و ناس تبتدي تيجي تطلب مني اني اعملها " coaching" في حياتها ... و أقرر ادرس كوتشينج ... و منه ابدأ دراسة ال family constellations therapy ...و ابقي بأعمل اللي كنت بأحلم بيه و انا صغير ، بس بطريقه مناسبه لتفكيري و لحياتي اكتر ...
المهم، القصه دي علمتني حاجات كتيره، منها أن التعليم مش دلاله علي اي حاجه في الحياه العمليه، لأن ناس كتير كانوا أوائل و صادفوا صعوبات كتيره في الحياه العمليه، و ناس كتيره كانوا بيتقال عليهم "فاشلين دراسيا" و نجحوا في حياتهم العمليه جدا!.
الحاجه التانيه، اتعلمت اني ما ابصش لنفسي من منظور انا ناجح أو فاشل أو حتي متفوق، لأن منير بتاع ال ١٠٠٪ هو نفسه منير بتاع ال ٧٨٪!، و طول ما انا باصص علي نفسي من منظور تعليمي (او من خلال شغلي او كم الفلوس اللي بأعملها ) طول ما حأفضل تحت ضغط اني محتاج اعيش في الصوره و الإطار ده!
الحاجه الاهم من كده، اني دلوقتي سعيد اني مادخلتش كلية طب و بقيت دكتور نفسي، لأن دراسة الطب دراسه متعبه جدا في مصر، و كمان لأن دراسة الطب النفسي بتعتمد اعتماد كبير علي دراسة الادويه و اساليب علاج مش شرط يكون الاهتمام الأكبر فيها بعلم النفس ، اللي هو اصلا اهتمامي و الحاجه اللي بحبها.
و لولا أني ماجبتش المجموع اللي انا عايزه ، ماكنتش درست family constellation therapy (الوقوف العائلي) ، و بقيت بأعمل اللي انا بأعمله دلوقتي و مستمتع بيه!
" و عسي أن تكرهوا شيئا و هو خير لكم"
YouTube: Monir El Shazly
Facebook page: @monirelshazlyspiritual
Instagram: Monir.elshazly
Comments