اسبوع العرفان بالجميل (١)

بمناسبة الشهر اللي انا اتولد فيه، بقالي ٦ سنين بأعمل سلسله من البوستات في بداية شهر ديسمبر علي التجارب الصعبه اللي مريت بيها و فرقت معايا في الحياه ... و حاسس بالشكر لربنا عليها لأنها علمتني حاجات كتيره ...

--------

تجارب مهمه في حياتي (١)

ناس كتير ما تعرفش اني كان عندي مشكله كبيره في الكلام و انا صغير (stuttering)... و اني روحت لدكاتره كتير علشان يعالجوني و ماحدش يعرف يعمل معايا فرق كبير .

المشكله دي استمرت معايا من و انا عندي ٤ سنين ...و ابتدت تقل تدريجيا من و انا عندي ١٥. .لغاية ما اختفت (تقريبا) و انا في أواخر مرحلة المراهقه ...

المشكله دي كانت بتسببلي ضيق كبير و خوف من الاختلاط بالناس لأن كان دائما عندي شعور اني اقل منهم (او أن فيا مشكله و هم لأ).

دلوقتي لما ببص علي المشكله دي، بلاقي أنها افادتي كتير في حياتي اللي انا فيها دلوقتي ...لأنها خلتني اقرأ كتير في علم النفس (اللي هو المجال اللي انا بحبه و بشتغل فيه دلوقتي )، و خلتني اعرف يعني ايه الواحد يبقي عنده شعور بالنقص و الخوف، و خلتني كمان اعرف اكتر عن نفسي، و عن قدرتي علي التحمل و التعامل مع المواقف ...

مش بس كده، المشكله دي خلتني كمان أمثل مسرحيه و انا صغير، علشان اثبت لنفسي اني ممكن اتطور و اتغلب عليها.... و خلتني كمان اجرب مجالات زي التدريب و التدريس في الجامعه بعد كده ... إنما اهم حاجه اتعلمتها، هي أن لما حد بيجييلي دلوقتي يقولي أن حاجه "مستحيل " أنها تحصل، او أنه "عمره ما حيقدر يتغلب علي شعور بالنقص عنده" ، ببقي عارف و متأكد أن الكلام ده مش صحيح ...و ان الحل دائما جوا الإنسان نفسه .... ممكن يستعين بحد يساعده، إنما لازم يكون مؤمن بقدرته علي التغيير ..و يبطل يركز علي مواطن النقص اللي شايفها في نفسه ، و يركز علي الحاجات الكثيره الحلوه بدالها !

يمكن المشكله دي لو ماكانتش ظهرت زمان، كانت طفولتي حتبقي مختلفه شويه، بس الاكيد انها لو ماكانتش موجوده، ماكنتش حبقي نفس الشخص اللي انا عليه دلوقتي، بنظرتي للحيا دلوقتي، و بالرضا اللي انا فيه دلوقتي!

#منير_الشاذلي

(إعادة نشر)

YouTube: Monir El Shazly

Facebook page: @monirelshazlyspiritual

Instagram: Monir.elshazly